बिबिसी कपको उपाधि आयोजकलाई

बनेपा ÷ काभ्रे जिल्लाकै इतिहासमा सर्वाधिक धनराशीको फुटबल प्रतियोगिता बिबिसी कप २०७० को उपाधि आयोजक बनेपा ब्वाइज क्लब (बिबिसी) नीलोले जितेको छ ।
हिजो भएको प्रतियोगिताको फाइनल खेलमा आयोजक बिबिसी नीलोले पनौती स्पोर्ट्स क्बललाई ३–२ गोल अन्तरले पराजित गरेको हो । खेलको शुरुवाती मिनेटमै पनौतीको साजन प्रधानले गोल गर्दै १–० को अग्रता दिलाए पनि जितको सुनिश्चितता भने गर्न सकेनन् । पहिलो हाफमा अग्रता लिएको पनौती स्पोर्ट्स क्लबले बिबिसीलाई
दबाबमा राखेको थियो । दोस्रो हाफमा बिबिसी नीलोका जर्जप्रिन्स कार्कीले १ तथा संसारनन्द पलाञ्चोकेको १ गोलबाट निर्धारित समयमा बराबरी भएको थियो । अतिरिक्त समयमा जर्जप्रिन्स कार्कीले फ्रिकिक मार्फत गोल गरेपछि बिबिसीले उपाधि रक्षा गरेको हो ।
प्रतियोगिताको हाइस्कोरर तथा म्यान अफ द सिरिजको उपाधि बिबिसीका सरोज थापाले जितेका छन् । त्यस्तै, बेस्ट किपर बिबिसीका निखिल श्रेष्ठ, बेस्ट डिफेन्स सुरेश ढकाल (बिबिसी), बेस्ट टिम स्पोर्टिङ्ग चौकोट, म्यान अफ द म्याच जर्जप्रिन्स कार्की र उत्कृष्ट प्रशिक्षकको उपाधि बिबिसीका विक्रम प्रजापति र किशोर वरुण श्रेष्ठ भएका छन् ।
प्रतियोगिताको समापन कार्यक्रम अखिल नेपाल फुटबल संघ एन्फाका केन्द्रीय उपाध्यक्ष कर्मछिरिङ्ग शेर्पाको प्रमुख आतिथ्यता र बनेपा ब्वाइज क्लबका अध्यक्ष महेशकुमार कर्माचार्यको सभापतित्वमा सम्पन्न भएको थियो । सोही अवसरमा बनेपाका स्थानियवासी एवं काभ्रे क्षेत्र नं. ३ का विजयी सभासद् कञ्चनचन्द्र वादेलाई प्रमुख अतिथि शेर्पा र क्लबका अध्यक्ष कर्माचार्यले संयुक्त रुपमा सम्मान गरेका थिए ।
प्रतियोगिताको फाइनल खेल प्रमुख अतिथि शेर्पाले बल हस्तान्तरण गर्दै खेल शुरु गरिएको थियो ।