काभ्रे काँग्रेसका हस्ती एमाले प्रवेश

काभ्रे– काभ्रेका चर्चित पत्रकार एवं नेपाली काँग्रेस काभ्रेका हस्ती बिष्णुप्रसाद चौलागाईं नेकपा एमालेमा प्रवेश गरेका छन् । चौलागाईंलाई नेकपा एमालेका केन्द्रीय सदस्य एवं काभ्रे जिल्ला यन्चार्ज ईश्वरी रिजाल र नेकपा एमाले काभ्रेका पूर्व जिल्ला अध्यक्ष तथा केन्द्रीय स्कुल विभागका सदस्य गोकुल बाँस्कोटाले एमालेमा स्वागत गरेका थिए ।

कार्यक्रमलाई सम्बोधन गर्दै नेता रिजालले बाम एकताले काँग्रेसमा हलचल मच्चिएको बताए । रिजालले नेपाली काँग्रेसले विगतमा मुलुकको नेतृत्व गर्दाका क्षण जनताले अवलोकन गर्नुपर्ने बताए । धेरैपटक सरकार चलाएको काँग्रसबाट मुलुकको समृद्धि सम्भव नभएको बताउँदै अब मुलुक र जनताले काँग्रेसको विकल्प खोज्ने बताए । उनले पाँच वर्षको गबन्धनको शासन पछि जनताले काँग्रेसलाई कहिल्यै साथ नदिने अवस्था उत्पन्न हुने उनको भनाई थियो ।

कार्यक्रमलाई सम्बोधन गर्दै नेता बाँस्कोटाले काँग्रेस बाम गठबन्धनका विरुद्ध अनेक हल्ला फैलाउन लागि परेको बताउँदै नेपाली काँग्रेस अबको निर्वाचनपछि पाँच बर्ष सत्ता बाहिर हुने र बाँच वर्षपछि अदृष्य हुने स्थितिमा पुगेको बताउँदै हल्लाका पछि नलाग्न सबैलाई आग्रह गरे । रिजालले बाम एकताको सहमतीले झस्किएको काँग्रेसले एकता नहुने दावी गरेपनि विगतमा माले र माक्र्सवादीबिचको एकता जसरी कुनै पनि दरार नरही एकीकरण हुने बताए ।

नेकपा एमाले काभ्रेका अध्यक्ष टोकबहादुर वाइवाको अध्यक्षतामा सम्पन्न कार्यक्रममा सांसद रामहरि सुवेदी, नेकपा एमाले काभ्रेका उपाध्यक्ष अशोक ब्याञ्जु, उपसचिव इन्द्र तामाङ, सचिवालय सदस्यहरू बसुन्धरा हुमागाईं, मुकुन्द गौतम, हरिशरण दाहाल, अमित लामा, नेता दिपक गौतम, कुमार तिमल्सिना, राकेश लामा लगायतको सहभागिता रहेको थियो ।