सिर्जनालयमा मेरो सानो घर लोकार्पण

पनौती-कवि सूर्यप्रसाद लाकोजूको हालै प्रकाशित बालकविता सङ्ग्रह मेरो सानो घर एक कार्यक्रम वीच लोकार्पण भएको छ । अक्षरमार्ग सिर्जना समूहले चौमासिक रूपमा संचालन गर्दै आएको सिर्जनालयको चौथो श्रृङ्खलामा सम्पन्न सोही कार्यक्रममा रेखाकवि टंक साम्बाहाम्फे, कवि तारा के.सी. र मुक्तककार मीलन समीर सुनिएका पनि छन् ।

लामो समयदेखि साहित्यको कविता विधामा कलम चलाउँदै रेखा कवितालाई स्थापित बनाउनसकृय हुँदै आएका आएका रेखाकवि टंक साम्बाहाम्फेले समसामयिक विषयका आधा दर्जन आफ्ना रेखा कविताहरू सुनाएका थिए । त्यस्तै कवि तारा के.सी. ले पनि समसामयिक विषयक आधा दर्जन कविताहरू सुनाए । उनले बा, बुढो मास्टर, प्रिय छोरी लगायतका कविता सुनाइन । स्याङजाली मुक्तककार मीलन समीरले देशप्रेम, जातिय स्वाभिमान, प्रेमप्रणय जस्ता विषयमा आफ्ना एक दर्जन चोटिला मुक्तकहरू सुनाए ।

सोही कार्यक्रममा कवि सूर्यप्रसाद लाकोजूको नयाँ बालकविता सङ्ग्रह मेरो सानो घरको लोकार्पण कार्यक्रम समेत सम्पन्न भएको थियो । कार्यक्रममा सहभागीहरूले सो पुस्तकको संयुक्त रूपमा विमोचन गरेका थिए । १६ ओटा बालकविताहरू रहेको सो बालकवितासङ्ग्रहमा बालकविता अनुसारका चित्र पनि राखिएका छन् । कविता सङ्ग्रह रत्न पुस्तक भण्डारले प्रकाशन गरेको हो । कवि लाकोजूका बालसाहित्यका लगायत अन्य साहित्य विधाका गरी २१ ओटा पुस्तक प्रकाशित छन् ।

ज्ञान विकास पुस्तकालयको शभाकक्षमा भएको सो कार्यक्रममा विशिष्ट अतिथि साहित्यकार सूर्यप्रसाद लाकोजू, डा. गोपाल पौड्याल मण्डने, खेम पोखरेल, उमेश पाण्डे सिर्जनालयमा प्रस्तुत सिर्जनाहरूका बारेमा आ आफ्ना मन्तब्य ब्यक्त गरेका थिए । कार्यक्रम सिर्जनालयका संयोजक शम्भुलाल श्रेष्ठको सभापतित्वमा सम्पन्न भएको थियो ।