वडावासीलाई कृषिमा आत्मनिर्भर बनाउनेछौं ः अध्यक्ष दाहाल

काभ्रे । स्थानीय निर्वाचन २०७९ बाट पनौती नगरपालिका वडा नं. ४ मा निर्वाचित वडा अध्यक्ष दीपक दाहालले सोमबार पदभार ग्रहण गर्दै वडावासीलाई कृषि र पर्यटनमा आत्मनिर्भर बनाउने प्रतिबद्धता जाहेर गर्नुभएको छ ।
आफ्नो सम्बोधनमा सम्भावनाले भरिएको पनौती नगरपालिका वडा नं. ४ को पहिचान दिने गरी वडाको विकासका लागि वडावासीहरुलाई समृद्ध बनाउनुपर्ने दायित्वका साथ आफू निर्वाचित भएको स्मरण गराउनुभएको छ । प्रचुर मात्रामा कृषि र पशु पालनको सम्भावना रहेको यस वडामा आधुनिक किसिमले कृषि खेतीतर्फ किसानहरुलाई आकर्षित गर्दै लैजाने योजनाहरुलाई पहिलो प्राथमिकतामा राखेर समानुपातिक समावेशी ढंगबाट वडाभित्रका समस्याहरुलाई सम्बोधन गर्नु नै आफ्नो पहिलो दायित्व रहेको बताउनुभएको छ ।
वडा नं. ४ भूगोल र जनमतको हिसाबले पनि ठूलो हुनुको साथै नगरको राजधानी पनि हो । किनकी यही वडामा नगरपालिकाको कार्यालय समेत रहेको हुँदा अधिकांश आन्तरिक भ्रमणमा आउने पाहुनाहरुका लागि कृषि, पर्यटनको गन्तव्य बनाउन पनि आवश्यक छ । जसका लागि होम–स्टेलाई आधुनिकीकरण गर्दै समय सापेक्षिक ढंगबाट अगाडि बढाउनु वडाको दायित्व पनि हो । यसका लागि सम्पूर्ण वडावासी, दाजुभाई, दिदीबहिनीहरुको आवश्यक सहयोग अनिवार्य हुन आउँछ । सहकार्यबाटै वडालाई नमूनायोग्य बनाउने योजनाका साथ जिम्मेवारी सम्हाल्न आइपुगेका छौं, हामी वडावासीलाई विश्वास दिन चाहन्छौं, हाम्रो पाँच वर्ष अनुकरणयोग्य रहनेछ । जसबाट नयाँ आउने नेतृत्वले अनुशरण गर्न बाध्य बनाउनेछौं भन्ने योजनासहित जिम्मेवारी बहन गरेका छौं । वडाभित्रका बाटोघाटो, पुल, पुलेसा, खानेपानी लगायतका विषयहरुलाई प्राथमिकताका साथ अगाडि बढाउनेछौं । यसका लागि सम्पूर्ण राजनीतिककर्मी, सामाजिक व्यक्तित्वहरुको सहयोगको आवश्यकता पर्दछ । त्यसका लागि हातेमालो गर्न वडा समिति सदैव तयार रहेको अध्यक्ष दाहालले प्रष्ट्याउनुभएको छ ।
सम्बोधनकै क्रममा वडाभित्र अस्तव्यस्त अवस्थामा रहेको विद्युतीकरणलाई समयको माग अनुसार व्यवस्थित गर्दै लैजाने महत्वपूर्ण पक्ष रहेको हुँदा त्यसका लागि सबै वडावासीको सहयोग अनिवार्य सम्झेको छु, आशा छ, प्राप्त हुन्छ ।