सहकारी संस्थाप्रति हेर्ने दृष्टिकोण परिवर्तन हुनुपर्छ – पराजुली

बनेपा-परिकल्पना साकोसको नवौं वार्षिक साधारण सभालाई सम्बोधन गर्दै जिल्ला सहकारी संघका अध्यक्ष एवं कार्यक्रमका प्रमुख अतिथि विनोद पराजुलीले सहकारी नीतिसंगत ढंगबाट चल्नुपर्छ भन्नुहुँदै सहकारीप्रति हेर्ने दृष्टिकोण कमाउमुखी भएको छ, त्यो किसिमको दृष्टिकोण परिवर्तन गर्नु आवश्यक छ । जबसम्म त्यस्ता खालका चिन्तनबाट माथि उठ्न सकेनौं भने समस्या निम्तिन सक्छ । त्यसलाई चिर्न आवश्यक छ । सहकारी नियमावली अनुसार अब २ हजार शेयर सदस्य हुनुपर्ने प्रावधान छ । त्यसलाई पछ्याउँदै आफूलाई शुद्धिकरण गर्नु सहकारीको धर्म भएको बताउनुभएको छ ।

कार्यक्रममा संस्थाका सल्लाहकार कृष्णप्रसाद तिमल्सिनाले संस्थाले जुन किसिमले फड्को पार गर्न खोज्दै छ । त्यसलाई सबै शेयर सदस्यहरुको सहयोग आवश्यक छ । सबै साथ भयो भने असम्भव भन्ने छैन भन्नुहुँदै सहकारीका सिद्धान्तलाई आत्मसाथ गरेर जानुको विकल्प छैन भन्नुभयो ।

संस्थाका अध्यक्ष राधाकृष्ण श्रेष्ठको अध्यक्षतामा सम्पन्न उक्त साधारण सभा प्रगति प्रतिवेदन संस्थाका सचिव पूर्णचन्द्र सिग्देलले पेश गर्नुभएको थियो भने आर्थिक प्रतिवेदन कोषाध्यक्ष शम्भु पौडेलले पेश गर्नुभएको थियो । त्यसैगरी लेखा सुपरिवेक्षण समितिका संयोजक इन्द्रमणि न्यौपानेबाट लेखा सम्बन्धी प्रतिवेदन साधारण सभा समक्ष पेश भएको थियो ।

कार्यक्रममा उत्कृष्ट बाल बचत, उत्कृष्ट ऋणी, उत्कृष्ट नियमित बचतकर्ता र शेयर सदस्यहरुमध्येका २०७५ को एसइईमा उत्कृष्ट अंक ल्याएका दुई जना बालबालिकाहरुलाई नगद सहित अभिषेक ढकाल र प्रकृति श्रेष्ठलाई सम्मान गरिएको थियो ।