सञ्चारकर्मी हुमागाईंद्वारा आभार व्यक्त

बिपशना शाक्य
बनेपा/गत मंसिर ९ गते सोमबार साँझ गाडी दुर्घटनामा परी गम्भीर घाइते हुनपुग्नु भएका सञ्चारकर्मी प्रल्हाद शर्मा हुमागाईंले पुनर्जीवन दिन महत्वपूर्ण भूमिका खेल्नुहुने सम्पूर्ण शुभेच्छुकप्रति आभार व्यक्त गर्नुभएको छ ।

आफू संलग्न सञ्चार माध्यम प्रभातफेरी साप्ताहिक र प्रभातफेरी अनलाइनमार्फत् सार्वजनिक गर्नुभएको अभिव्यक्तिमा उल्लेख गरेअनुसार हुमागाईंको आज १६औं दिन मंगलबार साँझ विधिवत् डिस्चार्ज गर्दै न्यूरो विशेषज्ञ डा. राजिव झाको सुझाव छ– “पुनर्जीवन पाउनुभएको छ तर खतरामुक्त भने हुनुहुन्न ।” डा. झाको टिमले आज साँझ पछिल्लो परीक्षण गरेको छ । परीक्षणपछि दिएको रिपोर्ट पश्चात सञ्चारकर्मी हुमागाईंले शुभचिन्तक, सञ्चारकर्मी, राजनैतिककर्मी, उपचारमा संलग्न चिकित्सकहरु, परिचारिकाहरुप्रति आभार व्यक्त गरेका छन् ।

विशेष गरी दुर्घटना स्थलमा तत्काल उद्धारमा खट्नुहुने सन्तोष बञ्जारा लगायत स्थानीयवासीहरु, तुरुन्तै उपचारका लागि शीर मेमोरियल अस्पतालसम्म ल्याउने प्रचण्ड बञ्जारा लगायतको टिम, शीर मेमोरियल अस्पतालमा आकस्मिक कक्षमा कार्यरत लगायत डा. अजय यादव लगायतका चिकित्सक टिम साथै नर्भिकसम्मको यात्रामा सघाउने डा. ऋषि अधिकारी, डा. निर्मल कार्की र आफ्नो ज्यानको समेत पर्वाह नगरी जोखिम उठाएर अन्नपूर्ण अस्पताल, ट्रमा सेन्टर हुँदै नर्भिक अस्पतालमा कल्पनाभन्दा अगावै पु¥याउन चुनौती उठाउने एम्बुलेन्स चालक सुदन भुजेल र नर्भिक अस्पतालको न्यूरो विशेषज्ञ डा. झाको टिमप्रति हृदयदेखि आभार व्यक्त गर्दछु भन्नुभएको छ ।