निजी भन्दा कम छैनन् सामुदायिक विद्यालय- पन्थी,विव्यस अध्यक्षमा पुन पन्त

पाँचखाल/पाँचखाल नगरका शिक्षा शाखा प्रमुख दिनानाथ पन्थीले अभिभावक, विद्यार्थी र विद्यालय व्यवस्थापन समितिले शिक्षाको गुणस्तरको लागि ठूलो भूमिका खेल्न सक्ने बताउनुभयो ।

पाँचखाल–६ तिनपिप्तलेमा रहेको जोरपाटी माध्यमिक विद्यालयको ७५औं वार्षिकोत्सव तथा अभिभावक भेलाको क्रममा उक्त धारणा राख्नुभएको थियो । उहाँले थप्नुभयो, सामुदायिक विद्यालयहरु निजी विद्यालयभन्दा कम छैनन् । समयको माग अनुसार सामुदायिक विद्यालयहरुमा अंग्रेजी माध्यमबाट पठनपाठन सुरु गरेको बताउनुभयो । पाँचखालमा शिक्षाको गुणस्तर सुधार्नको लागि आफू निरन्तर लागिपरेको बताउनुहुँदै पाँचखालवासी शिक्षासेवी एवं अभिभावकहरुले साथ सहयोग दिनुपर्ने बताउनुभयो ।
विद्यालय व्यवस्थापन समितिका अध्यक्ष भोजराज पन्तको सभातित्वमा सम्पन्न उक्त कार्यक्रममा पाँचखाल नगरपालिका वडा नं. ६ का वडाध्यक्ष रामशरण दुलाल, दिनानाथ ढुंगाना, धर्मराज राई, नन्दकुमार श्रेष्ठ लगायतले सामुदायिक विद्यालयमा गुणस्तरीय शिक्षा प्रदान गर्ने विषयमा आ–आफ्नो धारणा राख्नुभएको थियो ।

विद्यालयका सहायक प्रधानाध्यापक ऋषिकेश नेपालले स्वागत मन्तव्य राखी सुरु गरेको उक्त कार्यक्रममा विद्यालयका प्रधानाध्यापक बद्रीप्रसाद ढुंगानाले प्रगति प्रतिवेदन एवं आगामी वर्षको कार्ययोजना प्रस्तुत गर्नुभएको थियो । लेखापाल कृष्णबहादुर पोख्रेलले आर्थिक प्रतिवेदन प्रस्तुत गर्नुभएको थियो भने कार्यक्रमको सञ्चालन शिक्षक यादव प्रसाद सिटौलाले गर्नुभएको थियो ।

अभिभावक भेलाबाट पुनः भोजराज पन्तको अध्यक्षतामा विद्यालय व्यवस्थापन समिति गठन भएको छ । जसको सदस्यमा मञ्जु गौतम, रामशरण दुलाल, भिमबहादुर ढुंगाना, राजन श्रेष्ठ, शुक्रमाया दनुवार, अप्सरा मिजार, शिक्षक प्रतिनिधि यादव प्रसाद सिटौला, सदस्य सचिव प्रधानाध्यापक बद्रीप्रसाद ढुंगाना रहनुभएको छ । त्यसैगरी नन्दकुमार श्रेष्ठको अध्यक्षतामा शिक्षक अभिभावक संघ गठन भएको छ । जसको सदस्यमा चन्द्रबहादुर खड्का, राधिका केसी, शान्ति दनुवार, सुभद्रा पराजुली, नन्द बहादुर अधिकारी, चण्डिका राउत रहनुभएको छ ।