१०औं वर्षगाँठको अवसरमा रक्तदान

बनेपा/सहकारीहरुको बिचमा छुट्टै पहिचान राख्न परिकल्पना बचत तथा ऋण सहकारी संस्था लि.ले आफ्नो १०औं वर्षगाँठ गत शुक्रबार भव्य र सभ्य रुपमा सम्पन्न गरेको छ ।

उक्त कार्यक्रममा बनेपा नगरपालिका वडा नं. ७ का वडा अध्यक्ष वर्ण शाक्यले प्रमुख आतिथ्यता गर्नुभएको थियो । प्रमुख अतिथि शाक्यले सहकारीहरुले पैसाको मात्र कारोबार नगरी शेयर सदस्य लगायत नागरिकहरुको आय आर्जन र सामूहिक दायित्वतर्फ ध्यान दिन आवश्यक रहेको स्मरण गराउँदै पछिल्लो समय सहकारीका बारेमा फैलिएको भ्रमलाई चिर्न पारदर्शी ढंगबाट अगाडि बढ्नुको विकल्प नभएको बताउनुभएको छ ।

कार्यक्रममा संस्थाका अध्यक्ष राधाकृष्ण श्रेष्ठले केक काटेर वर्षगाँठको शुभारम्भ गर्नुभएको थियो । १०औं वर्षगाँठ समारोहसम्म आइपुग्दा संस्थाले गरेको प्रगतिप्रति सम्पूर्ण शेयर सदस्य, कर्मचारी, शुभचिन्तकहरुको अतुलनीय भूमिका रहेकोमा अध्यक्ष श्रेष्ठले आभार व्यक्त गर्दै आगामी दिनमा पनि यस्तै किसिमको सहयोग र सद्भावको अपेक्षा राखेको बताउनुभएको छ ।

सामाजिक दायित्वअन्तर्गत खुला रक्तदान कार्यक्रमको आयोजना गरिएको थियो । उक्त रक्तदान कार्यक्रममा दर्जनौं रक्तदाताहरुले रक्तदान गरी मानवीय सेवामा अतुलनीय योगदान दिनुभएको थियो । सो समारोहको अध्यक्षता संस्थाका अध्यक्ष राधाकृष्ण श्रेष्ठले गर्नुभएको थियो भने कार्यक्रमको सञ्चालन संस्थाका सचिव पूर्णचन्द्र सिग्देलले गर्नुभएको थियो । कार्यक्रमलाई सभ्य र भव्य रुपमा सम्पन्न संस्थाका प्रबन्धक किरण थापा लगायत कर्मचारी टिमले अनुकरणीय भूमिका निर्वाह गरेको देखिन्थ्यो । कार्यक्रममा रक्तदाताहरुलाई प्रमुख अतिथिबाट प्रमाणपत्र वितरण गरिएको थियो ।