कोभिड १९ बाट गर्भवती महिलाले सोच्नुपर्ने विषय

आर.एल.श्रेष्ठ

विश्वमा हालसम्म कोभिड १९ बाट लाखांैले ज्यान गुमाइसकेका छन् । त्यसभित्र गर्भवती महिला र गर्भमा रहेको शिशुसमेत यसको शिकार भइसकेका छन् । यस सन्दर्भमा गर्भवती महिलाले सोच्नुपर्ने विषयको रुपमा गर्भमा रहेको बच्चाको सुरक्षाको बारेमा सचेत हुन आवश्यक छ ।
गर्भावस्थामा आमाबाट बच्चामा यो भाइरस सर्ने वा नसर्ने तथा उक्त भाइरसले बच्चामा पार्ने असरका बारेमा पर्याप्त तथ्य उपलब्ध नभएता पनि यस विषयमा हाल अध्ययन भइरहेको विश्व स्वास्थ्य संगठनले जनाएको छ । गर्भवती महिलाहरूले भाइरसबाट जोगिन उपयुक्त सावधानी अपनाउनु पर्दछ र ज्वरो, खोकी वा सास फेर्न कठिनाईजस्ता लक्षणहरू देखिएमा समयमै स्वास्थ्य संस्था वा स्वास्थ्यकर्मीको निगरानीमा रहनुपर्छ ।

यसैबीच कोरोना भाइरस प्रभावित तथा यसको जोखिम भएका स्थानमा बसोबास गर्ने सबै आमाहरूले ज्वरो, खोकी वा सास फेर्न कठिनाईजस्ता लक्षणहरू देखिएमा समयमै स्वास्थ्य संस्थामा सम्पर्क गर्नुपर्दछ र प्राप्त सल्लाह अनुसार आफूलाई र बच्चाको ख्याल गर्नुपर्दछ । अर्काे महत्वपूर्ण पक्ष भनेको स्तनपानलाई लिन सकिन्छ । भाइरस प्रसारणमा यसको नगन्य भूमिकालाई ध्यानमा राख्दै स्तनपानलाई निरन्तरता दिन सकिन्छ तर भाइरसबाट जोगिनका लागि सावधानीहरू अपनाउनु पर्छ ।

अध्ययनअनुसार कोरोना भाइरसको लक्षण देखिएका तर सबल आमाहरूले भने स्तनपान गराउँदा र बालबालिकासँग नजिक हुँदा मास्क लगाउने, बालबालिकाको सम्पर्कमा आउनुभन्दा अगाडि तथा पछाडि हात धुने, संक्रमित वस्तु तथा सतहहरूलाई जिवाणु नाश हुनेगरि सफा गर्ने गर्नुपर्दछ जुन अन्य अवस्थामा पनि कोभिड १९ भएको शंका लागेका वा संक्रमित बालबालिका तथा वयस्कहरुसँग छलफल गर्दा यि सावधानीहरु अपनाउनुपर्छ ।

आमा निकै नै अस्वस्थ भएको अवस्थामा उनको दुध निकाली सफा कप वा चम्चाले शिशुलाई खुवाउन सकिन्छ र भाइरसबाट जोगिनका लागि सावधानीहरू अपनाउनु अत्यन्तै आवश्यक पक्ष हो । त्यसैले गर्भवती महिला र शिशुबीचको सम्बन्ध प्रगाढ राख्नु अर्काे बुद्धिमानी पक्ष हो । जसले आमालाई हिनताबोध हुनबाट जोगाउँछ तर यदि आमा भाइरसबाट ग्रसित छ भने यो सम्बन्ध आमासँग जोडिनु मनासिव हुँदैन । त्यसैले कुनै पनि कदम चाल्नु अगाडि स्पष्ट हुन आवश्यक छ । म प्रभावित छु, छैन कुन अवस्था हो त्यसको बारेमा आमा सुसूचित हुन जरुरी छ ।