९०औं स्थापना दिवस विपन्नहरुबीच सम्पन्न

बनेपा/आफ्नो स्थापनाको ९०औं वार्षिकोत्सव कोभिड–१९ का विरुद्ध विपन्नहरु माझमा गएर बिजनेश एण्ड प्रोफेशनल वोमन बनेपा शाखाले गरिब, विपन्न, कोभिड सम्बन्धी चेतना फैलाउँदै सोमबार एक कार्यक्रम बिच सम्पन्न गरेको छ ।
शाखाका अध्यक्ष ईश्वरी श्रेष्ठका अनुसार माउ संस्थाको स्थापना दिवसको अवसर पारेर बटुवा, विपन्न, गरिब वर्गहरुलाई लक्षित सेनिटाइजर, साबुन, मास्क वितरण गर्नुको सँगसँगै कोरोनाका बारेमा चेतनामूलक फ्लेक्स बोर्डहरु शहरका विभिन्न स्थानमा झुण्ड्याएर सुसूचित गराउने कार्य सम्पन्न भएको बताउनुभएको छ ।

नेपालमा लकडाउन सुरु भएको पनि १ सय ५७ दिन पार गरिरहँदा कति सर्वसाधारणलाई न लकडाउनको बारे थाहा छ, न कोरोनाकै बारेमा जानकार छन् । ति अशिक्षित, चेतनाविहिन वर्गहरुलाई सुसूचित गरेर आफ्नो स्थापना दिवस मनाएको अध्यक्ष श्रेष्ठको भनाइ छ ।

यात्रामा रहेका बटुवाहरुलाई मास्क लगाउन सिकाउनुको साथै साबुनपानीको महत्व समेत बताएको अध्यक्ष श्रेष्ठले जानकारी गराउनुभएको छ । नितान्त महिलाहरुप्रति लक्षित उद्देश्य साथ स्थापना भएको बिजनेश एण्ड प्रोफेशनल वोमन अन्तर्राष्ट्रियस्तरको गैर सरकारी संस्थाको रुपमा नेपालमा विभिन्न किसिमका कार्यक्रमहरु सञ्चालन गर्ने क्रममा बिजनेश एण्ड प्रोफेशनल वोमन बनेपा शाखाले संस्थाको वार्षिकोत्सवलाई उल्लेखित क्रियाकलाप गरेर मनाएको हो ।

उक्त कार्यक्रममा बनेपा शाखाका अध्यक्ष ईश्वरी बादे श्रेष्ठ, सचिव सुवासना श्रेष्ठ, सदस्यहरु रचना मानन्धर, जिना श्रेष्ठ र सरिता पलाञ्चोकेले कार्यक्रममा आवश्यक पर्ने भौतिक सामग्रीहरु साबुन, सेनिटाइजर, मास्क र फ्लेक्स बोर्डहरु लगायत उपलब्ध गराउनुभएको थियो । कार्यक्रमलाई संस्थाका पदाधिकारी र स्वयंसेवकहरुले सघाएका थिए ।