ढकाल गणेशमा मूर्ति अनावरण

बनेपा/सामाजिक दायित्व व्यक्तिको पनि रहन्छ । हाम्रो समाजमा सामाजिक दायित्व भनेको संघसंस्थाको मात्र हुन्छ भन्ने भ्रम छ । उक्त भ्रमलाई चिर्दै व्यवसायी जनक चौलागाईंले सामाजिक दायित्व अन्तर्गत ढकाल गणेशथानमा हनुमानको मूर्ति स्थापना गर्नुभएको छ ।
गत मंगलबार एक समारोहबीच सामाजिक व्यक्तित्व हरि शाहीको हातबाट मूर्तिको अनावरण गरिएको थियो । मूर्तिका स्थापनाकार चौलागाईंका अनुसार ढकाल गणेशथानको प्राङ्गणमा स्थापना गरिएको मूर्तिमा प्राणप्रतिष्ठा गरी मूर्तिको अनावरण गर्नुको साथै प्राङ्गणभित्र टुटेफुटेका स्थानहरुलाई मर्मत सम्भार गरिएको पनि चौलागाईंले बताउनुभएको छ ।
उक्त हनुमानको मूर्ति स्थापनाका लागि सम्पूर्ण लागत आफ्नो नीजि स्रोतबाट गरिएता पनि स्थापनाका लागि स्थानीय भद्रभलादमी र सामाजिक व्यक्तित्वहरुको सहयोग रहेको चौलागाईंले बताएका छन् । उहाँका अनुसार हाम्रो जिम्मेवारी सामाजिक दायित्वभित्र पनि पर्छ । त्यही अनुरुप आफूले सरसफाई गर्ने क्रममा हनुमानको मूर्तिको अभाव महसुस गरी स्थापना गर्ने सोच जागेपछि सोही बमोजिम इच्छा पूरा गरिएको बताउनुभएको छ ।