सोल्मामा सुधारिएको गोठ निर्माणका लागि जस्तापाता वितरण

रमन वन
खोटाङ/खोटाङको दिक्तेल रुपाकोट मझुवागढी नगरपालिका वडा नं. २ सोल्मामा गोठ सुधार सम्बन्धि कार्यक्रम कार्यान्वयनमा ल्याइएको छ । क्रिष्टियन एड नेपालको सहयोगमा बाल सेवा समाज नेपाल, नेर्पा खोटाङद्वारा सञ्चालित सशक्तिकरणका लागि महिला संलग्नता र जीविकोपार्जनका लागि उद्यमशिलता वी फिल परियोजनाअन्तर्गत अजम्बरी कृषक समूहमा पशुलानका लागि कार्यक्रम ल्याइएको हो ।
दिगो भू–व्यवस्थापनका माध्ययमबाट कृषि उत्पादन र उत्पादकत्व वृद्धि गरी कृषकको जीवनस्तर सुधार गरी अत्मानिर्भरता तर्फ उन्मुख गराउनका साथै समृद्ध नगर निर्माणमा नगरपालिकालाई सहयोग पु¥याउन, कम्पोष्ट मल प्रवर्धन मार्फत अर्गानिक कृषि उत्पादनमा जोड दिन नगरपालिकासँग सहकार्य गरी कार्यक्रम सञ्चालन गरिएको परियोजना प्रबन्धक युवराज रिजालले जानकारी दिनुभयो ।
सोल्मा स्थित अजम्बरी कृषक समूहका १९ घर परिवारमा सुधारिएको स्थायी र दिगो जस्तापाताको छाना सहितको फलामे ट्रष्ट लगाएर गोठ निर्माण गरिएको छ । नगरपालिकाले गोठ निर्माणका लागि सिमेन्ट उपलब्ध गराएको छ भने अन्य ट्रष्ट तथा छाना निर्माण कार्यका लागि बालसेवा समाज नेपालको करीब ७ लाख ९५ हजार रुपैयाँ र समूदायको समेत थप लगानीमा उक्त कार्यक्रम सञ्चालन गरिएको बताइएको छ ।
एउटा गोठ निर्माण गर्न करीब ६५ हजार लागत लागेको र नगरपालिका, बालसेवा समाज तथा स्थानीय जनसमूदाय समेतको करीब १२ लाख ३५ हजार लगानीमा यो कार्य सम्पन्न गर्न सम्भव भएको प्रवन्धक रिजालको भनाई छ ।
नगरपालिकाले स्थापना गरेको कम्पोष्ट मल प्लान्ट सञ्चालनका लागि सहयोग पु¥याउने उदेश्यले शनिबार दिक्तेल रुपाकोट मझुवागढी नगरपालिकाका प्रमुख दिपनारायण रिजालको बाहलीबाट उक्त कृषक समूहका १९ घर परिवालाई संस्थामार्फत जस्ता पाता हस्तान्तरण गरिएको हो ।
पूर्वी नेपालमा अवस्थित खोटाङ जिल्लामै पहिलो पटक कृषक समूह गठन गरी एकै ठाउँमा यस किसिमको गोठ निर्माण गरिएको छ । संस्थाले ५० वटा गोठ सुधारको लक्ष्य राखेकोमा खार्मी र पाथेकामा पनि अन्य गोठ निर्माणको कार्य अन्तिम चरणमा पुगेकोे जनाएको छ । उक्त गोठ पनि चाँडै हस्तान्तरण गरिने छ ।