नेपाली सक्षम छन्, मात्र निर्देशनको खाँचो छ

बनेपा/विभिन्न बाधा अवरोधका बाबजुद आइपरेका चुनौतीसँग भाग्ने होइन सामना गर्नुपर्छ भन्ने उत्प्रेरणाका साथ स्थानीयस्तरबाट कसैको मुख नताकी नमूनायोग्य कामको शुभारम्भ भएको छ ।
विकास निर्माणमा मौलाएका ढिलासुस्ती र भ्रष्टाचारले शिखर चुमिरहेको अवस्थामा बनेपा नगरपालिका वडा नं. ५ को क्षेत्राधिकार भित्र पर्ने बनेपा चण्डेश्वरी सडक मार्ग अन्तर्गत अस्पताल खण्डको सडक छेउमा बसोबास गरेका स्थानीय घरबेटीहरु अहिले खुशीले ढंग छन् । घरबाट निस्किने अस्वभाविक तरल पदार्थ लगायतका वस्तुहरुको विसर्जन गर्न स्थान नपाएर संकटग्रस्त अवस्थामा वर्षाैंदेखि तड्पिरहेका नगरवासीहरुका लागि उक्त अभियान मलमपट्टि लगाउने साधनको रुपमा स्थापित भएको छ । जसको नेतृत्व वडा नं. ५ का वडा अध्यक्ष बलराम अधिकारीले गरेका छन् । यसअघि यस्तै संकटमा परेका केही घरधनीहरुको लागि अस्थायी निकास दिने प्रयास गर्दाको पिडा सम्झँदै वडा अध्यक्ष अधिकारीको कथन थियो– जुन घटना घट्न पुग्यो, त्यसले व्यक्तिगत रुपमा मलाई आजसम्म पनि मर्माहित बनाएको छ । जसको परिणाम आज सकारात्मक रुपमा निस्किएको छ । मेरो जीवनमा कहिल्यै भुल्न नसक्ने घटना थियो त्यो । २१औं शताब्दीमा आएर पनि दासत्व स्वीकार्नुपर्ने जुन किसिमको दादागिरीको सिकार हुन म मात्र नभई स्थानीय समेत बने । त्यसैले दिएको प्रेरणा हो यो आजको निकास । यो अभियानमा कुनै नेताको योगदान छैन, कसैले १ रुपैयाँ लगानी गरेको छैनन्, छ त केवल उपभोक्ताहरुकै लगानी र चाहना छ । यसरी स्वतःस्फूर्त रुपमा उठेको भावनामा चोट पु¥याउन खोज्नु कहाँसम्मको मानवीय धर्म होला ? वडा अध्यक्षको तर्क थियो ।
यता उपभोक्ता समितिका अध्यक्ष प्रकाशकुमार श्रेष्ठको कथन छ– यो खण्डमा घरघडेरी हुनेहरु त घेराबन्दीमै परेका हुन् । जसको निकास आज यो ढल व्यवस्थापनले गरेको छ । हामी पिडितले लामो समय बस्यौं, भन्नु नै पर्दा वर्षाैं वर्ष पर्खिरह्यौं । न नगरपालिकाबाट केही होला कि भनेर तर कहिँकसैले कुनै किसिमको सुनुवाई गरेनन्, मात्रै रमिते बने । यो दयनीय अवस्थाको निकास अन्ततः हामी आफैंले दिनुको विकल्प छैन भन्ने अठोटमा पुगेर नै यो चुनौती उठाएका हौं । “विश्व इतिहासमा नेपाली सक्षम छन्, मात्र उनीहरुलाई निर्देशनको खाँचो छ । यो इतिहासलाई पुनः एकपटक व्यवहारमा उतार्ने जमर्काे गरेका छौं ।” यसलाई सहजीकरण र समन्वय गर्ने काम वडा अध्यक्षले गर्नुभएको छ । उहाँले सहमति जुटाइदिएकै कारण आज हामी ढल व्यवस्थापनमा सरिक भएर सफलतातर्फ अगाडि बढिरहेका छौं । सोही निर्देशन अनुसार म प्रल्हाद सापकोटा, वासु श्रेष्ठ र नारायण बडालको महत्वपूर्ण भूमिकाले आज यो सफलता प्राप्त गर्न अग्रसर भइरहेको छ । सम्भवतः बनेपा नगरमा स्थानीयस्तरबाट उठेको पहिलो जागरण हुनुपर्छ । जसबाट सरकारको मुख ताकेर मात्र विकास सम्भव छ भन्नेहरुका लागि प्रेरणाको एउटा स्रोत बनेको छ । यसले सरकारको र नेतामुखी हुनेहरुका लागि चोटिलो झापड पनि दिन खोजेको छ भन्नुहुन्छ अध्यक्ष श्रेष्ठ ।
प्राविधिक स्टमेट अनुसार हाल यो खण्डको २ सय ५० मिटर लम्बाईमा ढल व्यवस्थापन हुनेछ । सोको लागत झण्डै २० लाख भएता पनि १७ लाखमा ठेक्का दिएको अध्यक्ष श्रेष्ठले बताउनुभएको छ । उहाँका अनुसार यो खण्डमा करिब २५ घरघडेरीका उपभोक्ता रहेकोमा ५÷७ घडेरीका उपभोक्ताहरुले ढल व्यवस्थापनमा आबद्धता जनाउन चाहनुभएन । यसले केही नमिठो त हुनु स्वभाविक हो । हामी एक अर्थमा भन्ने हो भने मानवीय सेवामै छौं । उत्सर्जनलाई व्यवस्थापन गर्नु पनि मानवीय धर्म हो । त्यसका लागि आ–आफ्नो स्थानबाट सहयोग गरौं । जसले बनेपा नगरभित्रको अस्तव्यस्ततालाई अन्त गर्न महत्वपूर्ण भूमिका खेल्छ । यसका लागि पनि हामी सबै एकमत भएर जुट्नुको विकल्प छैन । अर्काे महत्वपूर्ण पाटो यस खण्डमा शीर मेमोरियल अस्पताल र एन.एन.सि.टी.आर. जस्ता महत्वपूर्ण संस्था छन् । उनीहरुले हाम्रो अभियानलाई सकारात्मक बाहकको रुपमा लिनुले पनि हामीमा बढि आशा पलाएको छ । नितान्त सामाजिक कार्य भएकोले सबैबाट यस्तै साथ र सहयोग रहनेछ भन्ने विश्वास श्रेष्ठले व्यक्त गर्नुभएको छ ।