जर्सी गाई सहित अबैध मालसामान बरामद

उर्मिला यादव
परासी/जिल्ला प्रहरी कार्यालय पश्चिम नवलपरासीले जिल्लाको विभिन्न स्थानबाट २ वटा जर्सी गाई सहित १ लाख ७१ हजार ५ सय मुल्य बराबरको अबैध मालसामान बरामद गरेको छ ।
प्रहरीका अनुसार सिमा प्रहरी चौकी महेशपुरबाट खटिएको प्रहरी टोलिले गत बिहिवार बिहान भारतबाट अबैध रूपमा नेपालतर्फ ल्याउदै गरेको २ वटा जर्सी गाई सरावल गाउँपालिका वडा नम्बर ४ ललितपुरबाट नियन्त्रणमा लिएको जनाएको छ । मानिसले गाई डो¥याएर ल्याउदै गर्दा प्रहरी टोलिलाई देखेपछि गाई छोडेर भागेको प्रहरीले जनाएको छ । बजार मूल्यअनुसार प्रति गाई अनुमानित ४० हजार पर्ने बताइएको छ । बेवारिसे रुपमा रहेका गाईलाई अहिले महेशपुर भन्सार कार्यालयमा बुझाइएको छ ।
त्यसैगरी बिहीवार नै प्रहरी चौकी भुजहवाको प्रहरी टोलिले नेपालबाट भारततर्फ अबैध रुपमा लैजादै गरेको अन्दाजी १३ हजार ५ सय मुल्य बराबरको ७ बोरामा २ सय २५ किलो हरियो केराउ सरावल गाउँपालिका वडा नम्बर ७ बर्गदवाबाट बरामद गरेको थियो । त्यस्तै गत बिहिवार नै ईलाका प्रहरी कार्यालय अमानिगन्जबाट खटिएको प्रहरी टोलिले नेपालबाट भारततर्फ अबैध रुपमा लैजाँदै गरेको लगभग ७८ हजार मुल्य बराबरको २५ बोरामा ९ सय ७५ किलो हरियो केराउ पाल्हीनन्दन गाउँपालिका वडा नम्बर २ मुडेराबाट बरामद गरेको प्रहरीले जनाएको छ ।
उक्त केराउ मानिसले साइकल तथा मोटरसाइकलमा राखी लैजादै गर्दा प्रहरी टोलिलाई देखेपछि बोरा फाली अभियुक्तहरु भागेको प्रहरीले जनाएको छ । सोही दिन बरामद भएका २ जर्सी गाई र १ हजार दुई सय किलो हरियो केराउ आवश्यक कारबाहिका लागि महेशपुर भन्सार कार्यालयमा बुुझाइएको जिल्ला प्रहरी कार्यालय पश्चिम नवलपरासीका प्रहरी नायब उपरीक्षक राजु लामाले जानकारी दिएका छन् ।