प्रधानमन्त्री कृषि आधुनिकीकरण परियोजनामा अनियमितता

रमन वन
खोटाङ/प्रधानमन्त्री कृषि आधुनिकीकरण परियोजनाका बारेमा व्यापक आलोचनाहरु नआएका होइनन् । यो विषयमा सिंगो नेपाल नै आलोचनाको भकारी भएको छ । पिडितहरुले पाउनुपर्ने सुविधा विलासितामा रम्नेहरुलाई पोसिएको उदाहरणहरु प्रशस्तै यो क्षेत्रमा भेटिएका छन् । सवाल खोटाङ, काभ्रे, सिन्धुपाल्चोक, धादिङ, भोजपुर मात्र होइन कार्यक्रम लागू भएका सबै जिल्लाहरुमा अनियमितताको चाङ लागेको छ ।
पछिल्लो समय खोटाङ जिल्लामा यो परियोजनाबारे अनियमितताको पराकाष्ट नाघेको छ । खोटाङको दिप्रुङचुइचुम्मा गाउँपालिकामा प्रधानमन्त्री कृषि आधुनिकीकरण परियोजनाको बजेटमा अनियमितता भएको पिडितहरुले बताएका छन् । यथार्थ कृषकहरुलाई नभई व्यवसायीहरुलाई पोस्ने काम परियोजनाले गरेको पिडितहरुको गुनासो छ ।
कृषि ज्ञान केन्द्र दिक्तेल अन्तर्गतको प्रधानमन्त्री कृषि आधुनिकीकरण परियोजना कार्यक्रममार्फत ३ वडामा सुन्तला ब्लक क्षेत्र विस्तारका लागि आर्थिक वर्ष २०७६÷०७७ मा छुट्टिएको ३५ लाख बजेटमध्ये रु. १२ लाख रूपैयाँ अनियमितता भएको पिडितहरुले दाबी गरेका छन् ।
परियोजनाको ३५ लाख र कृषकहरूबाट ३५ लाख गरि ७० लाखमा वडा नम्बर–१ याम्खा, वडा नम्बर–२ डाडाँगाउँ र वडा नम्बर–३ छोरम्बुलाई समावेश गर्ने गरि वडामा सुन्तला ब्लक क्षेत्र विस्तार कार्यक्रम लागु गरिएकोमा ३५ लाखमध्ये १२ लाख रकम छोरम्बु घर भएका सुन्तला ब्लक संचालन समितिका अध्यक्ष लक्ष्मी कुमार राई एवम् सचिव मनोज राईले हिनामिना गरेको आरोप पिडितको छ ।