काभ्रेली पत्रकारिताका हस्ती अस्ताए

बनेपा । काभ्रेली पत्रकारिता क्षेत्रमा छुट्टै पहिचान राख्न सफल व्यक्तित्व विष्णुप्रसाद चौलागाईं गत शुक्रबार यस धर्तीबाट बिदा लिएका छन् । उनको अवशानपछि काभ्रेली पत्रकारितामा ठूलो धक्का महसुस गरिएको छ ।

पछिल्लो घटनाक्रम अनुसार चौलागाईं कोरोना संक्रमित भएको र सोही कारण उहाँको ज्यान गएको परिवारजनले बताएका छन् । करिब तीन दशकदेखि पत्रकारितामा आवद्ध काभ्रेका पत्रकार चौलागाँईको शुक्रबार बिहान काठमाडौँस्थित ओम अस्पतालमा मृत्यु भएको उहाँका भाइ दिपक चौलागाँईले जानकारी दिएका थिए । काभ्रेबाट प्रकाशित हुने काभ्रे पोष्ट साप्ताहिकका सञ्चालक तथा प्रधान सम्पादक चौलागाँईमा गत असोज २६ गते कोरोना संक्रमण पुष्टी भएको परिवारले जनाएका थिए ।

कोरोना संक्रमण पुष्टी भएपछि उहाँ २७ गतेबाट ज्वरो बढेपछि उपचारका लागि ओम अस्पताल गएको र अस्पतालले होम आइसोलेसनमा बस्न सुझाव दिएपछि उहाँ घर फर्कनु भएको बताइएको छ । होम आइसोलेसनमा बस्दा बस्दै दाइलाई गाह्रो भएपछि कात्तिक १ गते अस्पतालमा भर्ना गरिएको भाइ दिपकले बताएका थिए । अस्पतालमा जाँदा कोरोनाका कारण उहाँको फोक्सोले ४० प्रतिशत मात्रै काम गरेको र आइसियुमा राखेर दश÷पन्ध्र दिन उपचार गर्नुपर्ने डाक्टरको सल्लाह अनुसार अक्सिजन थेरापीमार्फत उपचार गर्दागर्दै उहाँको गत शुक्रबार बिहान पौने ४ बजे मृत्यु भएको भाइ दिपकले सञ्चारकर्मीहरुको भेटमा बताएका थिए ।

पत्रकार चौलागाँईमा कोरोनाका साथै निमोनिया समेत भएको अस्पताल स्रोतको दाबी थियो । परिवारले बताएअनुसार उहाँ विगत केहि वर्षदखि इन्जाइटिस्बाट समेत पिडित रहेको बताइएको थियो । मृतक पत्रकार चौलागाँईको एक हप्ता अघि गत बिहिबारको रिपोर्टमा कोरोना संक्रमण नेगेटिभ देखिएको परिवारले बताएका थिए । मृतक चौलागाईंको पशुपती आर्यघाटमा अन्तिम संस्कार गरिएको थियो । उक्त अन्तिम संस्कार गर्ने क्रममा नेकपा काभ्रेका अध्यक्ष रुकु चौलागाईंले कम्युनिष्ट पार्टीको झण्डा ओढाएर अन्तिम श्रद्धाञ्जली व्यक्त गर्नुभएको थियो ।