समृद्ध मुलुक निर्माणमा व्यवसायीहरुको महत्वपूर्ण भूमिका छ ः अध्यक्ष गोल्छा

धुलिखेल । धुलिखेल उद्योग वाणिज्य संघको आयोजनामा नेपाल उद्योग वाणिज्य महासंघका नवनिर्वाचित अध्यक्ष लगायत सम्पूर्ण पदाधिकारीहरुलाई सम्मान तथा बधाई कार्यक्रमलाई सम्बोधन गर्ने क्रममा नवनिर्वाचित अध्यक्ष शेखर गोल्छाले समृद्ध मुलुक निर्माणमा व्यवसायीहरुको महत्वपूर्ण भूमिका रहेको बताउनुभएको छ ।

सोमबार धुलिखेलमा आयोजित सम्मान कार्यक्रमलाई सम्बोधन गर्ने क्रममा अध्यक्ष गोल्छाले समृद्ध मुलुक निर्माणमा व्यवसायीहरुको महत्वपूर्ण भूमिका रहेता पनि सरकार व्यवसायीहरुको समस्यातर्फ गम्भीर नभएको टिप्पणी समेत गर्नुभएको थियो । आफ्नो कार्यकालमा व्यवसायीहरुका समस्याहरुलाई पहिलो प्राथमिकतामा राखेर अगाडि बढ्ने प्रण समेत अध्यक्ष गोल्छाले कार्यक्रममा गर्नुभएको थियो ।
कार्यक्रमलाई उपाध्यक्ष चन्द्रप्रसाद ढकाल, दिनेश श्रेष्ठ, अञ्जन श्रेष्ठ, कोषाध्यक्ष सकुन्तलाल हिराचन, केन्द्रीय सदस्य सुरकृष्ण वैद्य, पूर्व केन्द्रीय सदस्य दिलसुन्दर श्रेष्ठ लगायतले निर्वाचित कार्यसमितिप्रति सफल कार्यकालको कामनासहित तत्काल महासंघले खेल्नुपर्ने भूमिकाका बारेमा सुझाव सहित आफ्ना भावनाहरु राख्नुभएको थियो । धुलिखेल उद्योग वाणिज्य संघका अध्यक्ष मञ्जुकुमार कोंजूले आफूहरुले व्यवसायिक हकहितको पक्षमा मात्र नरही समग्र धुलिखेलको विकास निर्माणमा व्यवसायीहरुले निर्वाह गर्नुपर्ने भूमिकाका बारेमा समेत सुसूचित गराउँदै आएको बताएका थिए । व्यवसायीहरुको उद्देश्य कमाउधन्दा मात्रै हो भन्ने चिन्तनबाट माथि उठ्नु आजको आवश्यकता हो । त्यसैले पनि हाम्रो मूल मर्म व्यवसाय भएता पनि सामाजिक सेवाबिना सफल हुन नसक्ने अध्यक्ष कोंजूको तर्क थियो । व्यवसायीहरु नितान्त व्यवसायमा लाग्ने हो भने देशको विकासको सम्भावना छैन । यदि मुलुक समृद्ध नहुने हो भने हाम्रो व्यवसायको कुनै अर्थ रहन्न । तसर्थ पनि हामी व्यवसायीहरुले व्यवसाय हकहितका लागि पनि केही समय छुट्याउनुपर्छ । तब मात्र व्यवसायिक हक हित र प्रवद्र्धनका लागि न्यायोचित ठहरिन्छ भन्नुभएको छ ।
कार्यक्रम धुलिखेल उद्योग वाणिज्य संघका अध्यक्ष मञ्जुकुमार कोंजूको अध्यक्षतामा सम्पन्न भएको थियो भने कार्यक्रमको सञ्चालन महासचिव कोमलसुन्दर श्रेष्ठले गर्नुभएको थियो ।