लायन बन्न समर्पण चाहिन्छ ः डिष्ट्रिक सेक्रेटरी केसी

बनेपा । चार्टर ह्याण्ड ओभर कार्यक्रममा आफ्नो अभिव्यक्ति राख्दै डिष्ट्रिक (३२५बि१) सेक्रेटरी सूर्य केसीको तर्क छ– लायन बन्न भित्रैदेखि समाजप्रतिको समर्पण चाहिन्छ । जब समर्पण हुन्न्, त्यहाँ लायनको कुनै अर्थ रहन्न भन्नुभएको छ ।
पछिल्लो समय लायन्स लिडरहरुमा केही सुस्तता देखिएको पक्कै हो । हुन त अन्तर्राष्ट्रिय परिस्थिति पनि त्यस्तै बनिदिएको छ । सुरुवाती दिनहरुमा जुन उर्जा लिएर लायन लिडर्स कार्यक्षेत्रमा भेटिन्छन् तर पछि विस्तारै सेलाउँदै गएको भान पनि देखेका छौं । अपवाद रुपमा भेटिने यि सुस्तताहरुले नयाँ पिढिँहरुलाई आकर्षणभन्दा वितृष्णा पो फैलाउने हो कि भन्ने चिन्ता पनि गम्भीर रुपमा उठ्नु नौलो होइन । त्यसैले लायन्स क्लबलाई जीवन्त दिने हो भने प्रत्येक लायन लिडरहरुले यस्ता किसिमका नकारात्मक प्रभाव पर्ने गतिविधिहरुबाट टाढै रहनुपर्ने बताउनुभएको छ । जब समाजप्रतिको दायित्व महसुस हुन्छ, तब लायन्स क्लब चलायमान भएको महसुस नागरिकले गर्ने गर्दछन् । त्यसको प्रमाण भनेकै आफूभन्दा माथिल्लो निकायलाई क्लबका गतिविधिबारे रिपोर्टिङ्ग गर्नु नै हो । जसले नेतृत्वलाई घचघच्याउने काम गर्दछ । उसले आफ्नो जिम्मेवारी महसुस गर्ने अवसर प्राप्त गर्ने छ । त्यसैले क्लबहरुले रिपोर्टिङ्ग गर्न कञ्जुस्याईं नगर्न पनि डिष्ट्रिक सेक्रेटरी केसीले लायन्स क्लबहरुका प्रेसिडेण्टहरुलाई आग्रह समेत गर्नुभएको छ ।
लायन्स क्लबका सदस्यहरुमा समाजप्रति समर्पित हुने सकारात्मक सोच हुनुपर्छ । सकारात्मक सोचले नै सार्थकता प्राप्त हुन्छ । त्यो नै सच्चा लायन हो । डिष्ट्रिक सेक्रेटरी केसीले थप्नुहुँदै आफ्ना अतितका बारेमा कार्यक्रममा प्रेरणाको रुपमा चर्चा गर्दै लायन सदस्यता प्राप्त गर्दाका क्षणहरु मननयोग्य रहेको समेत व्यक्त गर्नुभएको थियो । इमान्दारिता र जिम्मेवारीलाई आत्मसात् गर्नुको लायन्स क्लबमा अर्काे विकल्प नभएको खुलासा समेत डिष्ट्रिक सेक्रेटरी केसीले गर्नुभएको थियो ।