संविधान जित्छ भने कांग्रेस हार्न तयार छ ः सभापति आचार्य

“ओलि तेरो पाराले दुःख पाए साराले” “सत्तरी करोड कहाँ छ ? गोकुलेलाई थाहा छ ।”
“नेपाली जनताको एउटै स्वर, नेकपाभित्र चोरै–चोर”

बनेपा । ओलि सरकारको असंवैधानिक र अलोकतान्त्रिक कदमका विरुद्ध आयोजित विरोध सभालाई सम्बोधन गर्ने क्रममा नेपाली कांग्रेस काभ्रे जिल्ला सभापति मधुप्रसाद आचार्यले आफ्नो सम्बोधनको सुरुवात नै नाराबाट गरेका थिए ।
सम्बोधनकै क्रममा सभापति आचार्यले चुनाव गर्न घोषणा गरिएको होइन, सत्ताको आयु लम्ब्याउन र लुट्ने बहाना मात्रै बनाइएको हो । यो प्रपञ्चका बारेमा नेपाली जनतासमेत सचेत हुनुपर्ने अवस्था आएको स्मरण गराउनुहुँदै कम्युनिष्ट नाउँका कलंकले कमाउन गरेको एउटा नयाँ खेल हो । ओलि समूह वामपन्थी होइन, हामपन्थी हो । ओलि सरकारको सबैभन्दा ठूलो उपलब्धी भनेको विश्वसामु नेपाललाई भ्रष्टाचारी मुलुक भनेर चिनाउन सफल भएको छ । त्यसैले पनि यस्ता गैर कानूनी कार्य गर्ने यो असंवैधानिक कदमका विरुद्ध कांग्रेस फेरि सडकमा आएको छ । कांग्रेसलाई सत्ता होइन, विधिको शासन चाहिएको छ । त्यसैले कांग्रेस हार्न चाहन्छ, संविधान जित्नुपर्छ । कुनै व्यक्तिको सनकले संविधानमै नभएको विधि प्रयोग गरेर हजारौंको बलिदानबाट निर्माण भएको संविधानलाई कुल्चिन पाइन्नँ । नेपाली जनताले मतदान गरेका छैनन् । अस्थिरताको अवस्थामा रहेका मुलुकलाई स्थिरता दिने सरकार बनाउ भनेर मतदान गरेका हुन् । लामो समयदेखि अस्थिर अवस्थामा रहेको मुलुकले स्थिरता प्राप्त गरेको थियो । अस्थिर राजनीतिलाई अन्त गरेको थियो । बिडम्बना ! एउटा सन्कीले नियम, कानून केही होइन, सबथोक मै हुँ भनेर हजारौंको बलिदानलाई माटोमा मिलाइदियो । २००६ सालदेखिको निरन्तरता र हजारौंको बलिदानबाट प्राप्त सीमित अधिकार समेतलाई कुल्चिने काम भयो । यसले संविधानभन्दा माथि उठेर कदम चालिन्छ भने त्यहाँ व्यवस्था पनि नरहन सक्छ । त्यसैले पनि आन्दोलनको विकल्प छैन । नेकपाले निर्वाचन ताका जारी गरेको घोषणपत्र अनुसार के चाहिँ जनउत्तरदायी काम ग¥यो ? भन्दै नेकपाप्रति प्रश्न गर्न सभापति आचार्य पछि पर्नुभएन ।
घर कलहलाई ल्याएर मुलुकको भविष्यमाथि खेलवाड गर्ने हैसियत ओलिलाई कसले दियो ? के काम गर्न पाएनन् ओलिले ? राष्ट्रियताका मुद्दाका बारेमा रोकावट भो ? सरकारले पेश गरेका नीति तथा कार्यक्रमहरुमा अवरोध भो ? संसदमा निर्णयार्थ पेश गरेका बिलहरु पास भएनन् ? सयौं यस्ता अनुत्तरित प्रश्नहरु पेश गर्दै गैर जिम्मेवारी कामप्रति नेपाली कांग्रेस र नेपाली जनताले प्रधानमन्त्री ओलि र राष्ट्रपति भण्डारीलाई क्षमा दिने छैनन् भन्दै तितो यथार्थता कार्यक्रममाझ पोख्नुभएको थियो । आफ्नो सम्बोधनको अन्तमा पुनः माथिका नाराहरु लगाउँदै भनाइलाई सभापति आचार्यले बिट् मार्नुभएको थियो ।
उक्त विरोध सभामा पूर्व सांसद एवं नेका नेता कञ्चनचन्द्र बादे श्रेष्ठ, जिल्ला कोषाध्यक्ष कृष्णगोपाल भैल, नेताहरु विदुर घिमिरे, राम जोशी, निर्मला श्रेष्ठ, हरि कर्माचार्य, रोशन लामा, हरिशरण घिमिरे, योगराज दाहाल लगायतका दर्जनौं नेतागणले नेपालको विषम् परिस्थितिका बारेमा चर्चा गर्नुभएको थियो । कार्यक्रमको सञ्चालन नेकाका बनेपा नगर सचिव महेश कर्माचार्यले गर्नुभएको थियो भने कार्यक्रमको अध्यक्षता नगर सभापति राम जोशीले गर्नुभएको थियो । कार्यक्रमको आयोजना नेपाली कांग्रेस बनेपा नगर समितिले गरेको थियो ।