पत्रकार महिलाहरुको गुणात्मक विकास गर्नु आजको आवश्यकता ः उपाध्यक्ष बुढाथोकी

काठमाडौं । नेपाल पत्रकार महासंघको केन्द्रीय कार्यालय परिसरमा महिला समितिको समन्वयमा व्यवस्थापन गरिएको पत्रकार महिला आवास गृहको आज उद्घाटन गर्नुहुँदै नेपाल पत्रकार महासंघका प्रथम महिला उपाध्यक्ष राधा बुढाथोकीको कथन थियो– पछिल्लो समय मुलुकमा महिला पत्रकारहरुको संख्यात्मक विकास भएता पनि गुणात्मक रुपमा विकास हुन भने नसकिरहेको बताउनुभएको छ ।

मुलुकका विभिन्न स्थानबाट काठमाडौंमा आउने पत्रकार महिलाहरुको लागि यो आवास गृह उपयुक्त हुने विश्वास व्यक्त गर्नुहुँदै आगामी दिनमा गुणात्मक विकासका लागि महासंघले बढीभन्दा बढी साधन स्रोतको प्रयोग गर्दै पत्रकार महिलाहरुलाई दक्ष बनाउनुपर्ने धारणा समेत उपाध्यक्ष बुढाथोकीले राख्नुभएको छ ।

कार्यक्रमलाई सम्बोधन गर्दै नेपाल पत्रकार महासंघक अध्यक्ष गोविन्द आचार्यले पत्रकार महिलाका हक अधिकारका लागि महासंघ प्रतिवद्ध रहँदैआएको स्मरण गराउनुभएको थियो ।

नेपाल पत्रकार महासंघका महिला समिति संयोजक लक्ष्मी पुनले आवास गृहको शुरुवात गरेको र यसको क्षमता विस्तारमा अझ ध्यान दिदै जाने कार्यक्रममा जानकारी गराउनुभएको थियो । उहाँले अहिले तत्काल रहेको आवास गृहमा १ वटा मातृत्व कक्ष सहित १० जना पत्रकार महिला अट्ने क्षमता रहेको बताउनुभएको थियो ।

नेपाल पत्रकार महासंघको केन्द्रिय कार्यालय परिसरमा यस अघि पुरुष आवास गृह रहेकोमा अहिले महिला आवास गृहको शुरुवात गरिएको हो । हाल पुरुष आवास गृहमा बस्ने पुरुष पत्रकारले एक दिनको १ सय रुपैयाँ र पत्रकार महिलाले ५० रुपैयाँ रजिष्टेशन गर्ने व्यवस्था गरिएको पत्रकार महिला समितिले कार्यक्रममा जानकारी गराएको थियो ।