लोकतान्त्रिक आन्दोलनमा महासंघको महत्वपूर्ण भूमिका छ ः सभामुख सापकोटा

काठमाडौ । नेपाल पत्रकार महासंघको २६औं महाधिबेशनबाट निर्वाचित नयाँ कार्यसमितिलाई धन्यवाद व्यक्त गर्दै मुलुकको परिवर्तनमा नेपाल पत्रकार महासंघको लोकतान्त्रिक आन्दोलनमा महत्वपूर्ण भूमिका रहेको कार्यक्रमका प्रमुख अतिथि सम्माननीय सभामुख अग्निप्रसाद सापकोटाले आइतबार पदभार हस्तान्तरण कार्यक्रममा बताउनुभएको छ ।
उहाँले नवनिर्वाचित कार्यसमितिका पदाधिकारी एवं सदस्यहरुलाई सफल कार्यकालको शुभकामना व्यक्त गर्दै महासंघले पूर्ण लोकतन्त्रको अभ्यास गरेको लोकतन्त्रका लागि भएका हरेक आन्दोलनमा महासंघले प्रमुख भूमिका निर्वाह गर्नुपर्ने बताउनुभएको थियो । त्यसैगरी उहाँले देश कठिन मोडमा रहेको भन्दै यो बेला पत्रकारहरुको महत्वपूर्ण भूमिका रहने चर्चा समेत गर्नुभएको थियो ।
नेपाल पत्रकार महासंघका नवनिर्वाचित अध्यक्ष विपुल पोख्रेलले नेपाल पत्रकार महासंघ प्रेस तथा अभिव्यक्ति स्वतन्त्रताका लागि स्थापित संस्था रहेको भन्दै लोकतन्त्र, प्रेस स्वतन्त्रता नागरिक अधिकार र श्रमजीवी पत्रकारको हकहितका लागि प्रतिवद्ध रहने समेत सो कार्यक्रममा बताउनुभएको थियो । उहाँले नवनिर्वाचित केन्द्रीय सदस्य बबिन शर्मालाई प्रहरीले धरपकड गरेको भन्दै प्रकाशित समाचारबारे छानविन गर्ने संस्था नेपाल प्रहरी नभई प्रेस काउन्सिल रहेको समेत स्मरण गराउनुभएको थियो ।
निवर्तमान अध्यक्ष गोविन्द आचार्यले नेपाल पत्रकार महासंघको इतिहासमा हरेक कार्यसमितिको भूमिका महत्वपूर्ण रहेको भन्दै आफ्नो कार्यकालबाट महासंघको नेतृत्व चयन प्रत्यक्ष निर्वाचन प्रणालीबाट हुने अभ्यास सुरु गरिएको बताउनुभएको थियो । कार्यक्रममा आफूले महासंघलाई थप समावेशी बनाउने अवसर प्राप्त भएको पनि आचार्यले बताउनुभएको थियो ।
उक्त कार्यक्रममा पूर्व सभापतिहरु डा. सुरेश आचार्य, तारानाथ दाहाल, धर्मेन्द्र झा, पूर्व अध्यक्षहरु शिव गाउँले र डा.महेन्द्र विष्टले शुभकामना मन्तव्य राख्नुभएको थियो ।