पत्रकार महासंघद्वारा सञ्चारकर्मीप्रति गम्भीर चिन्ता जाहेर

हटौंडा । नेपाल पत्रकार महासंघ बागमती प्रदेश समिति अन्तर्गतका १० जिल्लामा कार्यरत सञ्चारकर्मीहरुलाई सचेत गराउँदै समाचार सम्प्रेषणमा सावधानी अपनाउन आग्रह गरेको छ ।

बागमती प्रदेशमा क्रियाशील सञ्चारकर्मी कोभिड १९ बाट संक्रमित भई स्वास्थ्य उपचार गराइरहेको जानकारी गराउँदै संक्रमित भएकामध्ये मकवानपुरमा १०, रामेछापमा ६, काभ्रेमा ४, चितवनमा ३, धादिङमा ३, सिन्धलीमा २, नुवाकोटमा १, सिन्धुपाल्चोकमा १ र दोलखामा १ जना रहेको विज्ञप्तिमा उल्लेख गरेको छ । कोरोना संक्रमित भई स्वास्थ्य उपचारमा रहेका सबै सञ्चारकर्मीहरुको शीघ्र स्वास्थ्य लाभको कामना सहित सुरक्षित रहन विज्ञप्तिमा आग्रह गरिएको छ । महासचिव कृष्ण सारु मगरद्वारा हस्ताक्षरित विज्ञप्तिमा भनिएको छ– जनतालाई सुसूचित गर्ने संवैधानिक दायित्व बोकेका सञ्चारकर्मीहरुले समाचार संकलन तथा सम्प्रेषण गर्न अस्पताल तथा स्वास्थ्य केन्द्र, आइसोलेसन, क्वारेन्टाइन क्षेत्र र भीडभाड भएका ठाउँमा अग्रभागमा रहेर समाचार संकलन कार्य गर्नुपर्ने बाध्यता भएकाले पूर्ण स्वास्थ्य सकतर्कता अपनाउन सबै सञ्चारकर्मीहरुलाई महासंघ आह्वान गर्दछ । सञ्चारकर्मीहरुलाई अग्रपंक्तिमा खटिने वर्ग (फ्रन्ट लाइनर) घोषणा गरि उनीहरुको स्वास्थ्य र सुरक्षाको बिशेष प्रबन्ध गर्न सरकारसँग माग गर्दछौं ।

सबै सञ्चार गृहहरुलाई कार्यस्थलमा खटिने सञ्चारकर्मीका लागि पूर्वसतर्कताको तयारी गर्न, आवश्यक सामग्रीको प्रबन्ध गर्न र महासंघ जिल्ला शाखाहरुलाई बिपदको समयमा जोखिम मोलेर समाचार संकलनमा खटिने सम्पूर्ण सञ्चारकर्मीहरुलाई आवश्यक सतकर्ता अपनाएर समाचार संकलन गर्ने बातावरण निर्माणको लागि आवश्यक समन्वय गर्न आग्रह गर्दछौं । महासंघ प्रदेश समितिले प्रदेश सरकार एवं स्थानीय तहसंग समन्वय गरि सञ्चारकर्मीहरुलाई स्वास्थ्य समग्री र राहत एवं उपचारका लागि समन्वय तथा पहल गरिरहेको पनि विज्ञप्तिमा उल्लेख छ ।

साथै पत्रकारहरुको ध्यानाकर्षण गर्दै समाचार सम्प्रेषण गर्दा सत्य, तथ्य र यथार्थपरक समाचार सम्प्रेषण गरी जनतालाई सहि सूचना प्रवाह गर्न पनि सञ्चारकर्मीहरुलाई महासंघको विशेष आग्रह रहेको विज्ञप्तिमा उल्लेख छ ।