विपत्को समयमा नआत्तिकन धैर्यता अपनाऔं ः अध्यक्ष लामा

काभ्रे । कोभिड १९ को दोस्रो लहरसँगै परिस्थिति भयावह बन्दै गईरहेको अवस्थामा रोशी गाउँपालिकाका अध्यक्ष डिबी लामाले विपत्को समयमा नआत्तिकन नेपाल सरकारले तोकेको स्वास्थ्य मापदण्ड पूर्ण रुपमा पालना गरी यो समयमा धैर्यता अपनाउन अनुरोध गरेका छन् । अध्यक्ष लामाका अनुसार रोशी गाउँपालिकाले कोभिड रोकथाम एवं नियन्त्रणको सिलसिलामा जनप्रतिनिधि, शिक्षक, समुदाय, मिडिया मार्फत विभिन्न सचेतनामूलक कार्यक्रमहरु सञ्चालन गरिरहेको बताएका छन् ।

गाउँपालिकाका १२ वटै स्वास्थ्य केन्द्रलाई सक्रिय बनाएको अध्यक्ष लामाले जानकारी दिनुभएको छ । एक नम्बर वडामा स्थापना गरिएको अस्थायी कोभिड अस्पतालबाट सेवा प्रवाह गरिआएको छ । नमोबुद्ध नगरपालिकासँगको सहकार्यमा मेथिनकोट अस्पताल नजिक जनक बहुमुखी क्याम्पसमा ४० बेडको अक्सिजन सहितको आइसोलेसन स्थापना गरिएको छ । गाउँपालिकाबाट खरिद गरिएका ३ वटा एम्बुलेन्सलाई चोबिसै घन्टा सञ्चालन हुनेगरि प्रबन्ध गरिएको छ । कन्ट्याक ट्रेसिङमा परेका तथा लक्षण देखिएका बिरामीहरुको स्वाव संकलन गरी प्रदेश प्रयोगशाला पठाउने व्यवस्था गरिएको छ । आइसियु स्थापनाको लागि रोशी गाउँपालिका क्षेत्रमा उपयुुक्त भवन जनशक्ति एवं उपकरणको अभाव हुने भएकोले जिल्ल्लाका अन्य पालिकासँगको सहकार्यमा सुबिधा सम्पन्न आइसियु तथा भेण्टिलेसनको प्रबन्धका लागि गाउँपालिका जतिसुकै रकमको साझेदारीका लागि तत्पर रहेको अध्यक्ष लामाले बताउनुहुँदै बजारमा खाद्य सामग्रीको अभाव हुन नदिन आवश्यक सहजीकरण गरिएको समेत अध्यक्ष लामाले जानकारी दिनुभएको छ ।

हाल सञ्चालनमा रहेका एम्बुलेन्सले सेवा दिन अपर्याप्त भए जुनसुकै तवरले समेत सेवा दिन गाउँपालिका तयार रहेको बताउनुहुँदै गाउँपालिकाका नागरिकहरुले कुनै समस्यामा रहेको अवस्थामा समस्या गुम्स्याएर नराखी आ–आफ्ना वडाको जनप्रतिनिधि कर्मचारी तथा स्वास्थ्यकर्मीसँग समस्या राखिदिनुहुन अनुरोध समेत गर्नुभएको छ ।