जिल्लामा अनुगमन गर्दै राष्ट्रिय मानव अधिकार आयोग

काभ्रे । कोभिड १९ र त्यसको प्रभावका बारेमा काभ्रेपलाञ्चोक जिल्लाका पाँचखाल, धुलीखेल, पनौती र बनेपा नगरपालिका पुगेर मानव अधिकारको अवस्थाका बारेमा अनुगमन गरेको छ ।

राष्ट्रिय मानव अधिकार आयोग बागमती प्रदेश कार्यालय सानेपाका कार्यालय प्रमुख सहसचिव यज्ञप्रसाद अधिकारीको नेतृत्वमा खटिएको टोलीले जिल्ला कारागारका कैदी बन्दीको मानव अधिकारको अवस्थाका बारेमा अनुगमन गर्नुका साथै बेथानचोक गाँउपालिका र रोशी गाउँपालिकाको समेत अनुगमन गरेको छ । अनुगमन टोलीले औषधी तथा स्वास्थ्य सामग्री आपुर्तिको अवस्था, अक्सिजन उत्पादन तथा वितरण, स्वास्थ्य पूर्वाधारको अवस्था, सिमान्तकृत समुदायको अवस्था, उपभोक्तको अधिकार, आईसोलेसन केन्द्रहरुकोको अवस्था, स्वास्थ्यकर्मी र सुरक्षकर्मीको स्वास्थ्य अवस्था, शव व्यवस्थापन, सुरक्षाका स्वास्थ्य सामाग्रिहरुको उपलब्धता, भ्याक्सिन (खोप) को उपलब्धता विषयमा अनुगमन गरेको छ ।

टोलीले अनुगमनका क्रममा जिल्लामा कोभिड विरुद्धको पहिलो मात्रा खोप लगाउनेको संख्या ३७ हजार ५ सय ६२ रहेको र दोश्रो मात्रा खोप लगाउनेको संख्या १२ हजार ९ सय ६० रहेको आयोगले जनाएको छ । कोभिसिल्डको दोश्रो मात्रा खोप अभावमा दोश्रो डोज लगाउन नपाउँदा पहिलो मात्रा खोप लगाएका व्यक्तिहरु जोखीममा रहेको तथ्य प्राप्त भएको अनुगमनका क्रममा कोभिड संक्रमणका कारण काभ्रे जिल्लाका १ सय ५५ जना र अन्य जिल्लाबाट उपचारको क्रममा विभिन्न अस्पतालमा उपचारार्थ भर्ना भएका ५८ जना गरी जम्मा २ सय १३ जनाले मृत्यूवरण गर्नुपरेको र जिल्लाभरि जेठ २९ गते सम्म १ हजार ६ सय ६४ जना सक्रिय संक्रमित रहेको अनुगमन टोलीका सदस्य लोकनाथ घिमिरेले बताएको छ ।

आयोगका सहसचिव एवं अनुगमन टोलीका सयोजक यज्ञप्रसाद अधिकारीले अनुगमनका क्रममा कारागारमा रहेका १ सय ८ थुनुवा र १ सय ३० कैदीहरुलाई खोपको दुवै मात्रा पुरा गरेका कारण कोही कैदी बन्दी संक्रमित हुनु नपरेको तथा अनुगमनका क्रममा खोप लगाएको कारण फण्टलाईनमा काम गर्ने स्वास्थ्यकर्मी, सुरक्षाकर्मी, सरसफाईकर्मीहरु पहिलो चरणको जस्तो संक्रमित भएको नपाईएकोले पहिलो र दोश्रो डोज खोपको समयमा नै सवै नागरीकलाई सुनिश्चितता गर्न नेपाल सरकारलाई सिफारिस गर्र्ने उल्लेख गर्दै यो महामारी विरुद्ध एकजुट भएर लड्न र आम नागरिकलाई सचेता अपनाउन र सर्तक गराउनका लागि अनुगमन गरेको उल्लेख गर्नुभएको थियो ।

अनुगमन टोलीमा आयोगका सहसचिव अधिकारीको नेतृत्वमा रारा कर्माचार्य, लोकनाथ घिमिरे रहनुभएको थियो भने अनुगमन टोलीलाई मानव अधिकार संगठन काभ्रेका जिल्ला अध्यक्ष राजु सिग्देलले अनुगमन टोलीलाई सहजीकरण गरेको थियो ।