परिचय पत्र परिचयका लागि मात्र नभएर सिंगो मानवीय पहिचानको दस्तावेजको रुपमा आउनेछ ः उप–प्रमुख बञ्जारा

काभ्रे । पनौती नगरपालिकाका उपप्रमुख गीता बञ्जाराले राष्ट्रिय परिचय पत्र वितरण कार्यक्रमलाई प्रभावकारी र उपयोगीमूलक बनाउने राज्यको अनुरुप पनौती नगरपालिकामा पनि व्यवस्थित ढंगबाट सो प्रक्रियालाई अगाडि बढाउन लागिएको बताउनुहुँदै राष्ट्रिय परिचय पत्र, परिचयका लागि मात्र नभई सिंगो मानवीय पहिचानको दस्तावेजको रुपमा आउने खुलासा गर्नुभएको छ ।
आफ्नो फोटो खिचाउने र फारम भर्ने क्रममा उक्त अभिव्यक्ति राख्दै सम्पूर्ण नगरवासीलाई सो अभियानमा सरिक हुन समेत आग्रह गर्नुभएको थियो । गत हप्ताबाट पनौती नगरपालिकामा सुरु भएको राष्ट्रिय परिचय पत्र बनाउनेहरुको चाप अत्याधिक रहेको पनौती नगरपालिका वडा नं. ४ का वडा अध्यक्ष बुद्धसिं थापाले जानकारी गराएका छन् ।

उहाँका अनुसार अन्य पालिकाको दाँजोमा पनौती नगरपालिकाको पालो पछि आएरै हो कि के भएर हो, राष्ट्रिय परिचय पत्र बनाउन फोटो खिच्नेहरुको चाप सोचेभन्दा बढी नै पाएका छौं । यो उपस्थितिले नागरिकको चेतनास्तर कहाँसम्म पुगेको रहेछ भन्ने मापन गर्न अब सजिलै सकिन्छ । अन्य पालिकाको अवस्था कस्तो रह्यो थाहा भएन तर पनौती नगरमा भने यही रफ्तारमा जाने हो भने शतप्रतिशत सहभागिता रहने अड्कल गर्न सकिन्छ । भाद्र मसान्तसम्म समय सिमा तोकेर सामान्य सूचना जारी गरेका थियौं । सहभागितालाई हेर्ने हो भने त्यो अवधिसम्म पर्खनु पर्ला जस्तो लाग्दैन भन्नुहुन्छ अध्यक्ष थापा ।