मुक्तक

रुद्र अधिकारी, विशालनगर, काठमाडौं

१. कुनै अभिष्टको निम्ति साइनो जोड्ने छन् यहाँ
कपट छोप्न रामनामी बस्त्र ओढ्ने छन् यहाँ
परिस्थितिसँग एक्लै जुध्न् बानी बसालौं
किनकी असजिलोमा नै साथ छोड्ने छन् यहाँ ।

२.बास्ना नआए चन्दन कसले घोट्छ र ?
बेकामे चीज हराए कसले खोज्छ र ?
बरु अझै सचेत भएर हिंड्छ मान्छे,
ठेस लाग्दैमा हिंड्न नै कसले छोड्छ र?

३. हिमनदी झैं अस्रु निरन्तर बगेको छैन्
लाग्छ कि अब बग्नलाई केही बचेको छैन्
सधैं बर्षा किन हुँदैन बल्ल बुझ्दैैछु मैले,
किनकी पृथ्वीले यही त थेग्न सकेको छैन्।

४.समयले खुशी खै कता लगि टाँग्ने गर्छ
अधरले मुस्कुराउँने श्रोत माग्ने गर्छ
जिन्दगीको नियती हो कि भाग्यको हो खेल !
ठेस पनि जहाँ घाउ छ त्यहिँ लाग्ने गर्छ ।

५. कुनै बेलामा आदर्शको हावाले छुने रहेछ
पछि पछुताएर जिन्दगी सधैं रुने रहेछ
कैलेकाहीं जानकारीले दुखी पनि बनाउँछ,
केही कुरा थाहा नपाएकै राम्रो हुने रहेछ ।