‘परदेशी मित्र’ सार्वजनिक

काठमाडौं । इन्दिरा दीक्षितद्धारा लिखित कथा संग्रह ‘परदेशी मित्र’को एक समारोह बीच सार्वजनिक गरिएको छ । साहित्यकार,लघुकथा समाजका अध्यक्ष श्रीओम श्रेष्ठ रोदनको प्रमुख आतिथ्यता तथा भूँडीपुराण प्रकाशनको आयोजनामा उक्त कृति सार्वजनिक भएको हो ।
प्रमुख अतिथिको रुपमा आफ्नो मन्तब्य राख्दै श्रीओम श्रेष्ठ रोदनले नेपाली साहित्यमा विकृति र विसंगतीहरु मौलाउन थालेको आभाष हुन लागेकोले राम्रा लेखक,श्रष्टाहरु ओझेलमा परेको बताए । उनले सार्वजनिक गरिएको कथा सँग्रहको सफलताको कामना गर्दै निरन्तरको साधनाले श्रष्टाको उचाइ थपिने बताए । अर्का अतिथि बक्ता समालोचक,भाषाविद एवं साहित्यकार डा. विदुर चालिसेले अत्यन्तै सम्भावना बोकेकी कथाकारको रुपमा इन्दिरा दीक्षितको चर्चा गरे । उनले कथाकारबाट नेपाली भाषा साहित्यमा निरन्तरताको अपेक्षा पनि गरे ।
यस अघि एक कथा सँग्रह र एक नियात्रा संग्रह प्रकाशित गरिसकेका कथाकारको यो कृतिमाथि समिक्षा गर्दै समालोचक डा.ज्ञानु अधिकारी तथा डा.लेखप्रसाद निरौलाले राष्ट्रिय तथा अन्तराष्ट्रिय सामाजिक परिवेशलाई समेटेका कथाहरुको बाहुल्यता रहेको कथा संग्रहमा समावेश कथाहरुमा विश्वव्यापीकरणको असर,पशुपंक्षी र मानव सम्बन्ध,वैयक्तिक जीवनदर्शन,नारीजागरण दृष्टिकोण,वर्तमान कोभिड र यसका असर लगायतका विषयवस्तुलाई समावेश गरि लेखिएको बताए । सरल र सहज भाषाशैलीमा लेखिएका कथाहरुमा कतै कतै नियात्रा भानपर्ने जस्तो लाग्ने भएपनि मिठासयुक्त भाषाको प्रयुक्तिले कथाहरु पढौं लाग्ने भएको समेत चर्चा गरियो । समग्रमा देश परदेशमा रहेको सामाजिक यथार्थवादी धरातलहरुले छोएका कथा यसमा परेको समालोचकहरुले धारणा राखे ।
कथाकार दीक्षितले आफ्ना कथा गर्भविधानको बारेमा मन्तब्य राखेकी थिइन ।साहित्यकार प्रदीप सापकोटा,बसन्तराज अज्ञात,उमा दाहाल लगायतको उपस्थिति रहेको थियो उक्त कार्यक्रमको अध्यक्षता भुँडीपुराण प्रकाशनका प्रवन्ध निर्देशक केशव पराजुलीको अध्यक्षता तथा यादव भट्टराईको संचालनमा सम्पन्न भएको थियो ।