माटो दिवसलाई अवसरको रुपमा प्रयोग गर्दै पनौती

काभ्रे । ‘माटोको अम्लीयकरण रोकौं, माटोको उत्पादकत्व बढाऔँ’ भन्ने नाराका साथ विश्व माटो दिवस २०७८ लाई पनौती नगरपालिकाले नगरवासीहरुलाई अवसरको रुपमा लिएर उपयोग गर्न आग्रह गरेको छ । माटोमा दिनप्रतिदिन अम्लीयपनले उत्पादनलाई क्षयीकरण गरिरहेको अवस्थामा कृषि तथा पशुपंक्षी शाखा र माटो तथा मल परीक्षण प्रयोगशालाको संयुक्त आयोजनामा संचालित माटो जाँच शिविर सम्पन्न गरेको छ ।
कार्यक्रममा नगर प्रमुख भिम न्यौपाने कार्यक्रमका प्रमुख अतिथि पनौतीका नगर प्रमुख भिम न्यौपानेले पनौती नगरलाई सम्वृद्ध बनाउन कृषि र पशुपालनमा उन्नत तवरले बिकास गरेर मात्र सम्भव भएको उल्लेख गर्नुभएको थियो । नगर प्रमुख न्यौपानेले नगरपालिकाको आर्थिक सहयोगमा माटो परिक्षण र कृषि चुन वितरण गरिएको र आगामी दिनमा पनि कृषि र पशुपालनका हरेका कार्यक्रममा नगरपालिकाले कृषकसँग हातमा हात मिलाउँदै अगाडी बढ्ने प्रतिबद्धता ब्यक्त गर्नुभएको थियो ।
उक्त शिविरमा नगरभित्रका ४ सय ३ माटोको नमुना परिक्षण गरी सोको लागि आवश्यक पर्ने कृषि चुन निशुल्क वितरण समेत गरिएको पनौती नगरपालीका कृषि तथा पशु शाखा प्रमुख एवं कृषि विज्ञ मणि सापकोटाले जानकारी गराउनुभएको थियो ।
पनौती नगरपालिकाको आयोजनामा यस क्षेत्रका खेतियोग्य जमिनमा धेरै मात्रामा अम्लीयपनाको समस्या देखिएको कारण नै यस किसिमका शिविरहरु सञ्चालन गर्नुपरेको विज्ञ सापकोटाको दाबी छ । तीन दिनदेखि जारी बृहत माटो जाँच शिविरको कार्यक्रममा माटो बिशेषज्ञहरुले उक्त कुरा औंल्याएको जानकारी विज्ञ सापकोटाले गराउनुभएको थियो । गत आइतबार बिश्व माटो दिवसको अवसरमा पनौती नगरपालिकाको प्रांगणमा आयोजित बृहत माटो जाँच शिविर तथा कृषि चुन वितरण गरिएको थियो ।
पनौतीका १२ ओटै वडाका विभिन्न क्षेत्रका ४ सय भन्दा बढी माटोको नमुना परिक्षणमा जमिनमा धेरै मात्रामा अम्लीयपनाको समस्या देखिएको माटो तथा मल परिक्षण प्रयोगशाला हेटौंडाका डाक्टर जनार्दन खड्काले बताउनुभएको थियो । त्यसपछी माटोमा प्रांगारिक पदार्थको मात्र पनि कम पाईएको डाक्टर खड्काले जानकारी दिनुभएको थियो । साथै उहाँले नेपालमा खेतियोग्य जमिनको ५० प्रतिशत भन्दा बढी माटोमा अम्लीय समस्या रहेको बताउनुभएको थियो । बागमती प्रदेशमा ७० प्रतिशतसम्म माटोमा अम्लीय समस्या रहेको सो अवसरमा डा. खड्काले जानकारी दिनुभएको थियो ।
कृषि तथा पशु विकास समितिका संयोजक गुणनाथ सापकोटाको अध्यक्षतामा प्रमुख प्रशासकीय अधिकृत राम प्रसाद वाग्ले, बरिष्ठ प्रशासकीय अधिकृत इन्द्र प्रसाद अधिकारी तथा प्राविधिकहरुको उपस्थितिमा उक्त शिविर सम्पन्न भएको थियो ।
त्यसैगरी कृषि ज्ञान केन्द्रका तर्फबाट तेज प्रसाद दवाडीले माटोको अम्लीयकरण रोक्न सकियो भने पनि कृषि उत्पादनमा दोब्बर वृद्धि हुने बताउनुभएको थियो । माटोको अम्लीयपनाको रोकथामको लागि कृषि चुन प्रमुख औषधि रहेको सो अवसरमा बताउनुभएको थियो । संकलित नमुना विश्लेषण गर्न उपकरणहरू जडित घुम्ती प्रयोशालाबाट माटोको पी.एच प्रांगारिक पदार्थ, नाईट्रोजन, फस्फोरस र पोटासको परिक्षण गरिएको थियो । माटो दिवसको अवसरमा माटो तथा मल परिक्षण प्रयोशाला हेटौडाको तर्फबाट १० मेट्रिक टन र पनौती नगरपालिकाबाट १० मेट्रिक टन कृषि चुन र केहि कृषि तत्वहरु निःशुल्क वितरण गरिएको थियो ।