एकैदिन २१ जना फरार अभियुक्त पक्राउ

उर्मिला यादव यात्री
सुनवल । जिल्ला प्रहरी कार्यालय पश्चिम् नवलपरासीले सोमबार बिभिन्न मुद्धामा फरार रहेका २१ जना अभियुक्त पक्राउ गरेको छ ।
जिल्ला अदालत नवलपरासीबाट २०५७ सालदेखि २०७२ सालसम्मका बिभिन्न मितिमा फैसला भई कैद तथा जरिवाना तोकिई तत्काल सजाय भुक्तान गर्न बाँकी रहेका बाली विगो मुद्धाका ३ जना, कुटपिट मुद्धाका ४ जना, लुटपिट मुद्धाका १ जना, अंशवण्डा मुद्धाका ३ जना, गाली बेईज्यती मुद्धाका ५ जना, जाल साझी मुद्धाका ३ जना, वन मुद्धाका १ जना र विविध मुद्धाका १ जना गरि २१ जना फरार अभियुक्तहरु पक्राउ परेका हुन् । जिल्ला प्रहरी कार्यालय पश्चिम् नवलपरासी र मातहत समेतबाट खटिएको प्रहरी टोलीले जिल्लाको रामग्राम नगरपालिकाबाट ३ जना, सरावल गाउँपालिका अन्तर्गतको एरियाबाट ९ जना, बर्दघाट नगरपालिकाबाट ७ जना, प्रतापपुर गाउँपालिकाबाट १ जना र सुस्ता गाउँपालिकाबाट १ जना फरार अभियुक्त पक्राउ गरेको जनाएको छ ।
जिल्ला अदालतको लगत अनुसार प्रक्राउ पर्नेमा वन मुद्धाका १ जनाको १९ दिन कैद सजाय छ भने अन्य सबै २० जनाको जरिवाना तोकिएको छ । जरिवाना तोकिएकामा न्यूनतम २ सय ५० रुपैयाँ (जालसाजी मुद्धा) देखि अधिकतम ३७ हजार २ सय ५० रुपैयाँ (लुटपिट मुद्धा) सम्म रहेको छ । सोमबार पक्राउ परेका २१ जना अभियुक्तहरुको सजाय १९ दिन कैद र ६० हजार ८ सय ३४ रुपैयाँ जरिवाना रहेको छ । पक्राउ गरिएका २१ जना फरार अभियुक्तहरुलाई आवश्यक कारवाहीको लागि नवलपरासी जिल्ला अदालतमा पेश गरिएको र अदालतबाट लगत अनुसारको कारबाही भएको जिल्ला प्रहरी कार्यालयका सुचना अधिकारी प्रहरी नायव उपरीक्षक प्रेम बहादुर शाहीले बताउनु भयो ।
यस्तै गरि जिल्ला प्रहरी कार्यालय मातहत समेतबाट एक हप्ता भित्रमा बिभिन्न मुद्धाका ५८ जना फरार अभियुक्त जिल्लाको बिभिन्न स्थानबाट पक्राउ गरी आवश्यक कारवाहीको लागि जिल्ला अदालतमा पेश गरिएको जिल्ला प्रहरी कार्यालयका सुचना अधिकारी प्रहरी नायव उपरीक्षक शाहीले जानकारी दिनुभयो ।