बालबालिका माझ वैवाहिक उत्सव

काभ्रे । पछिल्लो समय वैवाहिक वर्षगाँठलाई तारे होटल र पार्टी प्यालेसमा विलासिताका साथ मनाउन संस्कारले प्रश्रय पाइरहँदा पनौती निवासी रमेश थापा र रमा थापाले भने सामुदायिक विद्यालयका बालबालिका बिचमा सामञ्जस्यता गरेर आफ्नो २४औं वैवाहिक उत्सवलाई मनाएका छन् ।

म र मेरी उनी नाम दिएर कार्यक्रमको शुभारम्भ गरेका थापा जोडीले पनौती नगरपालिका वडा नं. ४ मा रहेको बालकल्याण आधारभूत विद्यालयमा अध्ययनरत कक्षा १, २ र ३ का बालबालिकालाई पोशाक लगायत आवश्यक अन्य शैक्षिक सामग्री वितरण गरेर उदाहरणीय कार्यको थालनी गर्नुभएको छ ।
आफ्नो वैवाहिक वर्षगाँठको अवसरमा अन्य दाताहरुलाई पनि यसतर्फ आकर्षित गर्ने जमर्काे सहित कुवेर सापकोटाबाट स्कूले झोला, दीपक देउजाबाट जुत्ता, हेमकुमारी बञ्जाराबाट मोजा, नारायण प्रसाद तिमल्सिनाबाट स्वीटर लगायतका सामानहरु बालबालिकाहरुलाई वितरण गरिएको थियो ।

विद्यालय व्यवस्थापन समितिका अध्यक्षको उपस्थितिमा शिक्षक राजन तामाङबाट कार्यक्रमको सञ्चालन भएको थियो भने विद्यालयका प्रअ कल्याणी बोहोराबाट सहयोगी हातहरुप्रति आभार व्यक्त गर्दै आगामी दिनहरुमा पनि यस्तै किसिमका सहयोगका अपेक्षा सहित थापा दम्पत्तिले सामाजिक रुपमा चेतनाको दियो बाल्नुभएको स्मरण गराउनुहुँदै आजको यो देखासेखी समाजले यस किसिमका अनुकरणीय कार्यबाट पाठ सिक्नुपर्ने धारणा राख्नुभएको थियो ।
कार्यक्रममा थापा दम्पत्तिको तर्फबाट रमेश थापाले पछिल्लो समय भित्रिएका पश्चिमा शैलीप्रति तिखो आलोचना व्यक्त गर्दै त्यस किसिमको संस्कारले आफ्नो मौलिकता गुम्ने भएकोले यससँग सरोकार राख्ने सम्बन्धित पक्षले गम्भीरतापूर्वक यस विषयमा चासो दिनुपर्ने अवस्था आएको बताउनुभएको छ ।