व्यवसायको सम्मान गर्न सिकौं ः वैदार

काभ्रे । हामीले समाज रुपान्तरणमा जुन किसिमबाट भूमिका खेलिरहेका छौं, त्यो व्यवसायको बारेमा हामी आफैं चुकिरहेका छौं । त्यसैले आफ्नो व्यवसायको सम्मान गर्नुको विकल्प नरहेको व्यवसायी निर्मला वैदार (निरु) को कथन थियो– पछिल्लो समय जसरी व्यवसाय फस्टाएको छ, त्यो दाँजोमा हामीले हाम्रो व्यवसायलाई सम्मान दिन नसकेको तितो यथार्थता पस्कनुहुँदै व्यवसायी वैदारको तर्क थियो– जसरी आज विश्व भू–मण्डलीकरण एक क्लिकले पढ्न पाइन्छ, त्यसैगरी यो व्यवसायले पनि विशाल स्थान ओगट्दै गइरहेको छ । जुन किसिमको स्थायित्व प्राप्त गरेको छ, त्यसलाई अगाडि बढाउनका लागि नीति नियम र राज्यले खेल्नुपर्ने भूमिकालाई अझ समय सापेक्षित परिवर्तन गरी आजको आवश्यकता अनुसार टेलरिङ्ग व्यवसायलाई अगाडि बढाउनका लागि सक्षम नेतृत्वको सँगै सबल व्यवसायीहरुको पनि आवश्यकता रहन्छ ।
सो व्यवस्थापनका लागि राज्यको नीति निर्माण तहमा रहेका सरोकारवाला निकायले आयात तथा निर्यातका लागि मौजुदा पैठारी नीतिलाई परिवर्तन गर्न आवश्यक छ । जसका कारण हाम्रो उत्पादनले विदेशी बजारलाई सहज रुपमा पहुँच कायम गर्न सकोस् । तब मात्र टेलरिङ्ग व्यवसाय फस्टिन सक्ने र त्योसँग निर्भर रहेको जनशक्तिले यथेष्ट मात्रामा आयआर्जन गर्ने विश्वास व्यवसायी वैदारको छ । राज्यले पैठारी नीतिमा आमूल परिवर्तन नगर्ने हो भने यस उद्योगमा आत्मनिर्भर जनशक्ति पलायन हुनुको विकल्प नरहेको चर्चा गर्नुहुँदै कुनै पनि बेला यस उद्योगसँग निर्भर व्यवसायीहरु धरासायी हुने पनि व्यवसायी वैदारको चिन्ता छ ।