नागरिकले सुरक्षाको अनुभूति पाएका छन्, अवैध मदिरा नष्टको क्रम जारी

काभ्रे । पछिल्लो समय समग्र जिल्लाको सुरक्षा अवस्था खस्किएको त होइन भन्ने आभाष भइरहँदा जिल्ला प्रहरी कार्यालय मातहत रहेका युनिटहरुले आफ्नो उपस्थितिलाई सशक्त रुपमा अगाडि बढाएको महसुस हिजो बनेपामा देखिएको गतिविधिले पुष्टि गरेको छ ।
अवैध रुपमा मदिरा उत्पादन स्थलमा प्रहरीले छापा मारेर नागरिकलाई प्रहरीप्रतिको विश्वास बढाएको छ । बनेपा नगरपालिका वडा नं ७ स्थित गोदामचोकमा पुष्प मानन्धरले अवैध रुपमा सञ्चालन गर्दै आएको घरेलु मदिरा उत्पादन स्थलमा प्रहरीले छापा मारेको हो ।
प्रहरीका अनुसार अन्दाजी १६ सय लिटर कच्चा पदार्थको घरेलु मदिरा बरामद गरेको दाबी गरेको छ । यसैगरी काभ्रे प्रहरीले योभन्दा अगाडि पनि बनेपा नगरपालिका वडा नं ८ स्थित टेलिकम चोकमा छापा मारेको थियो । जसबाट समाजको शान्ति सुरक्षा खल्बलाउन पुग्ने तत्वहरुलाई नियन्त्रणमा लिई कारवाही अगाडि बढाएको छ ।त्यसैगरी पाँचखालसँग सिमा जोडिएको धुलिखेल नगरपालिका र पाँचखाल नगरपालिका वडा नं. ५ र ६ मा अवैध मदिरा बिक्री बितरण भई नागरिक समाजमा अशान्ती पुगेको जानकारी प्राप्त भएसँगै खावा प्रहरीले करिब ५ सय लिटर मदिरा नियन्त्रणमा लिएको छ ।
अबैध तथा घरेलुु मदिरा उत्पादन र बिक्री गरिरहेको पसल र व्यवसायीलाई सम्झाउने र चेतावनी दिँदै फेरि त्यस्तो कार्य गरेमा कानुनी कारबाही गरिने प्रहरी सहायक निरिक्षक बिमल श्रेष्ठले बताउनु भएको छ ।
समुदाय प्रहरी साझेदारी भन्ने प्रहरी सिद्धान्तका साथ खावा प्रहरी चौकिका ईन्चार्ज श्रेष्ठको नेतृत्वमा पाँचखाल को ५ र ६ तथा धुलिखेल को ८ नं. वडाबाट बिक्रीका लागि लैजाँदै गरेको घरेलु मदिरा जफत गरि ल्याईएको प्रहरी हवलदार लोकनाथ सापकोटाले जानकारी गराउनुभयो ।
उक्त मदिरा पाँचखाल नपा वडा नं. ५ का वडा सदस्य तोप प्रसाद सापकोटा, पत्रकार, स्थानिय समाजसेवीहरुको उपस्थितिमा बरामद गरिएको अवैध मदिरा नष्ट गरिएको थियो ।