शिक्षित बनौं अभियान नेपाल विद्यालयमा

बिपशना शाक्य

काभ्रे । काभ्रेपलाञ्चोक जिल्लाको बनेपा नगरपालिका १४ स्थित आशापुरेश्वरमा रहेको जागृति आधारभूत विद्यालयका विद्यार्थीहरुलाई शिक्षित बनौं अभियान नेपालले स्टेशनरी सामग्री वितरण गरिएको छ ।
विद्यार्थीहरूको शिक्षण सिकाइ क्रियाकलापमा सहयोग पुर्याउने उदेश्यका साथ शिक्षित बनौं अभियान नेपाल (Be Educated Movement  Nepal) ले विद्यार्थीहरू लाई स्टेशनरी सामग्री वितरण गरिएको हो । एक कार्यक्रम विच संस्थाका अध्यक्ष अशोकचन्द्र धुजु श्रेष्ठले विद्यालयका ८५ जना विद्यार्थीहरु लाई स्टेसनरी सामग्री वितरण गरेका थिए । बनेपा नगरपालिका भित्रको विद्यालय भएपनि बत्ती मुनिको अँध्यारोको रूपमा रहेको आशापुरेश्वर क्षेत्रका विद्यार्थीहरूलाई र विद्यालयलाई संस्थाले केही वर्ष अगाडि देखि नै सहयोग गर्दै आएको विद्यालयका प्रधानाध्यापक राजु बस्नेतले जानकारी गराएका छन् । संस्थाले विद्यालयमा पुस्तकालय पनि स्थापना गरेको छ ।
विद्यालयका प्रधानाध्यापक बस्नेतका अनुसार यस क्षेत्रमा प्रायः तामाङ बस्ती रहेको र सहरी क्षेत्रबाट नजिकै रहेपनि शिक्षा क्षेत्रमा साथै विभिन्न विकासका पूर्वाधारका योजनाहरू नपर्दा समस्या उत्पन्न भएको बताउनुहुँदै घण्टौं समय लगाएर हिँडेर विद्यालयमा विद्यार्थीहरु अध्ययन गर्न आउने भए पनि उनीहरूको घरको आर्थिक अवस्था नाजुक भएका कारण विद्यार्थीहरुले पढाई छाड्ने गरेको विद्यालयका प्रधानाध्यापक बस्नेतको गुनासो छ । धार्मिक हिसाबले अत्यन्तै महत्वपूर्ण अर्थ राख्ने आशापुरी महादेव मन्दिर नजिकै रहेको विद्यालयमा आशापुरेश्वर क्षेत्रका साथै सूर्यविनायक नगरपालिका काँक्राबारी क्षेत्रबाट पनि विद्यार्थीहरू अध्ययन गर्न आउने गरेको विद्यालयले जनाएको छ । स्टेशनरी सामग्री वितरण कार्यक्रममा संस्थाका अध्यक्ष अशोक चन्द्र धुजू श्रेष्ठ, कार्यक्रम संयोजक रामचन्द्र रञ्जित, विद्यालयका प्रधानाध्यापक राजु बस्नेत, अविभावक, शिक्षक र विद्यार्थीहरुको उपस्थिति रहेको थियो ।
उक्त अवसरमा बोल्दै संस्थाका अध्यक्ष श्रेष्ठले विद्यार्थीहरुलाई नयाँ शैक्षिकबाट ड्रेस र ट्र्याक सुट (पोशाक) पनि छिट्टै वितरण हुने बताउनुभएको छ । कार्यक्रममा संस्थालाई विद्यालयको तर्फबाट प्रशंसा पत्र दिएर सम्मान गरिएको थियो । कार्यक्रमको सञ्चालन विद्यालयका शिक्षक सुरेन्द्रराज खरेलले गरेका थिए ।