राजनीतिमा युवाहरुको आकर्षण सह्रानीय

आसन्न निर्वाचनलाई लिएर विभिन्न टिका टिप्पणी भइरहँदा यसपटकको निर्वाचनमा युवाहरुको उपस्थितिलाई हेर्ने हो भने राजनीतिमा युवाहरू आकर्षित भएको देखिन्छ ।
निर्वाचन आयोगले सार्वजनिक गरेको तथ्यांक हेर्दा २१ देखि ४० वर्षभित्रका ४१ प्रतिशत युवाहरु राजनीति नेतृत्व लिन सक्षम हुनु मुलुककै लागि सुखद पक्षका रुपमा लिन सकिन्छ । जुन उमेरका युवाहरु राजनीतिमा वितृष्णा जाग्दै विदेशिएका घटनाहरु हाम्रा अगाडि ताजै रहिरहँदा यस पटकको निर्वाचनमा ४१ प्रतिशत युवाहरुले नेतृत्व लिन लालायित हुनुलाई सुखद पक्षका रुपमा लिने ठाउँ कता–कता भेटिएको छ । यो भनेको सामाजिक कार्यमा युवाहरूको चासो बढ्नु नै हो । जसबाट राजनीतिक गतिविधिमा संलग्न भएर समृद्ध मुलुक बनाउँछु भन्ने सकारात्मक भावनाको विकास भएको मान्न सकिन्छ । यसलाई राजनीतिक दलहरुले सकारात्मक रुपमा लिएर नेतृत्वमा युवाहरूलाई अगाडि सार्नुले स्थानीय तह निर्वाचनको प्रतिस्पर्धा अझै रोचक देखिने आँकलन बौद्धिक दीर्घामा सहजै भेटिएको छ ।
अहिले युवाहरूलाई नै जुन किसिमको जिम्मेवारी दिन खोजिएको छ, त्यसको पछाडि युवा मतदाताहरूलाई आकर्षित गर्ने एउटा अस्त्र पनि हुनसक्ने ठम्याई हामीले गरेका छौं । कतै यो हात्तीको देखाउने दाँत नबनिदियोस्, राजनीतिक दलप्रति हाम्रो आग्रह छ । अन्यथा, युवाहरूको मनोभावनालाई क्षणिक रुपमा तुषारापात बनाउने अवस्थामा पुग्नेछ । त्यसैले स्थानीय सरकारको नेतृत्व गर्न युवाहरूलाई जसरी उक्साउनुभएको छ, त्यसैगरी उपल्लो तहहरूमा पनि युवाहरुको आकर्षण बढ्ने किसिमका गतिविधि र जिम्मेवारी दिनुहुनेछ भन्ने विश्वास हामीले लिएको छौं । युवाहरु आँटिला, स्वच्छ छविका र मतदाताको मन छिटै जित्नसक्ने भएकै कारण पनि साधनको रुपमा प्रयोग गर्न खोजिएको हो भने त्यो दुर्भाग्य सावित ठम्याइ हाम्रो छ ।