मानवीय कार्यका लागि जुनसुकै चुनौतीसँग सामना गर्न तयार छु ः अध्यक्ष मानन्धर

काभ्रे । जीवित फाउण्डेसनद्वारा आयोजित रक्तदान तथा रक्तदाता सम्मान कार्यक्रमलाई सम्बोधन गर्ने क्रममा कार्यक्रमका प्रमुख अतिथि एवं बनेपा नगरपालिका वडा नं. ८ का वडा अध्यक्ष शुभलक्ष्मी मानन्धरले रक्तदाताहरुलाई सम्बोधन गर्दै मानवीय सेवाको लागि आफू जुनसुकै चुनौतीसँग सामना गर्न तयार भएको बताउनुभएको छ ।

बनेपामा मंगलबार आयोजित उक्त कार्यक्रमलाई सम्बोधन गर्ने क्रममा अध्यक्ष मानन्धरले नीजिस्तरबाट खुलेका स्वास्थ्य संघ संस्थाले नागरिकहरुलाई पु¥याइएको सेवाका बारेमा चर्चा गर्नुहुँदै रक्तदान जीवनदान हो । हाम्रो शरीरबाट अस्वभाविक रुपमा खेर जाने रगतले अरु कसैले पुनर्जीवन प्राप्त गर्छ भने किन नसघाउने ? त्यस किसिमको भावना नागरिक स्तरमा जगाउन आवश्यक रहेको बताउनुभएको छ । आफूले २०औं वर्ष अघि लायन्स र जेसिसको माध्यमबाट रक्तदानका बारेमा नागरिकहरुलाई सुसूचित गरेको स्मरण गराउनुहुँदै त्यतिबेलाका भोगाइहरुलाई सम्बोधनका क्रममा व्यक्त गर्दै आज त्यो अवस्था नरहेको चर्चा गर्नुभएको छ ।
कार्यक्रममा रक्तदाताहरुको तर्फबाट नेपाल पत्रकार महासंघका पूर्व अध्यक्ष एवं रक्तदाता नारायणप्रसाद सापकोटाले समाजमा अझै पनि रक्तदान सम्बन्धी संकीर्णता बाँकी रहेको हुँदा जबसम्म ति तत्वहरुलाई चिर्न सकिँदैन तबसम्म रगत नपाएर मृत्युवरण गर्नुपर्ने बाध्यता रहिरहने बताउनुभएको छ । कार्यक्रममा फाउण्डेसनका तर्फबाट कार्यक्रमको अध्यक्षता गरिरहनुभएका जितेन्द्र कुमार थापाले समाज रुपान्तरण हुन समय लाग्ने प्रतिक्रिया दिनुहुँदै व्यवसाय मात्रै सबैथोक होइन । जब मानव जन्मिसकेपछि समाजले सामाजिक रुपमा जुन ऊप्रति जिम्मेवारी बहन गरेको हुन्छ, त्यसैगरी सामाजिक रुपमा हाम्रो जिम्मेवारी पनि त्यतिकै रहन्छ । सोही अनुरुप “हाम्रो प्रतिबद्धता रगतको कमी हुन नदिने युगको स्थापना” का साथ स्थापना गरिएको जीवित फाउण्डेसनलाई जीवन्त दिनु भनेकै कोहि पनि रगतको अभावमा समस्याग्रस्त नहोस् भन्ने नै हो । सोही उद्देश्य अनुरुप हाम्रो क्षेत्राधिकारभित्र रहेका कुनै पनि बिरामीहरुलाई रगतको अभाव हुन दिने छैनौं भन्ने प्रतिबद्धता जाहेर गर्नुभएको छ ।
विश्व रक्तदाता दिवसको अवसर पारेर रक्तदाताहरुलाई सम्मान एवं रक्तदान कार्यक्रम समेत उक्त अवसरमा गरिएको थियो । पछिल्लो समय नीजि स्तरबाट यस किसिमका कार्यक्रमहरु बाक्लिँदै गएको महसुस गर्न सकिने कार्यक्रमका वक्ताहरुले गर्नुभएको थियो ।
कार्यक्रममा १ सय २२ पटक रक्तदान गर्नुहुने रक्तदाता विदुर खड्का, १ सय ५ पटक रक्तदान गर्नुहुने पुण्यवती घले, १ सय १ पटक रक्तदान गर्नुहुने रक्तदाता रघुनाथ हुमागाईं, ९९ पटक रक्तदान गर्नुहुने नारायणप्रसाद सापकोटा, ७० पटक रक्तदान गर्नुहुने प्रल्हाद शर्मा हुमागाईं, ४१ पटक रक्तदान गर्नुहुने केशवराज पौडेल लगायतका रक्तदाताहरुलाई उक्त अवसरमा सम्मान गरिएको छ । सोही अवसरमा १७ प्रिन्ट रगत समेत संकलन गरिएको छ । सो कार्यका लागि नेपाल रेडक्रस सोसाइटीको प्राविधिक टोलीले महत्वपूर्ण भूमिका निर्वाह गरेको प्राविधिक प्रमुख राधा थापाले जानकारी दिनुभएको छ ।