सहयोगी हातहरु अग्नी पिडितसम्म

काभ्रे । पनौती नगरपालिका वडा नं. ४, ऐरिगाउँमा बुधबार बिहान ८ः०० बजे भएको आगलागी पिडित परिवारलाई सहयोगी हातहरु एकपछि अर्काे गरी थपिँदै गएका छन् ।
आगलागी खबर पाउनासाथ प्रहरी चौकी पनौतीका इन्चार्ज प्रहरी नायव निरीक्षक कपिल कार्कीको नेतृत्वमा गएको प्रहरी र स्थानीयहरुको सहयोगमा लामो समयको अन्तरालमा आगलागी नियन्त्रणमा लिएको हो ।
पिडित रामबहादुर केसीका अनुसार नगद, लत्ताकपडा, खाद्यान्न, भौतिक संरचना समेत गरी २६ लाख बराबरको क्षति पुगेको बताउनुभएको छ । यसरी एकसरो कपडाभन्दा बाहेक कुनै वस्तु निकाल्न नसकेको पिडित केसीले बताउनुभएको छ । उक्त आगलागीको घटनालाई लिएर तत्कालै नेपाली कांग्रेस वडा नं. ४ सभापति एवं सामाजिक अभियान्ता महेश थापाको पहलमा चामल ४ बोरा, सिरक डस्ना २/२ सेट, ब्लाङ्केट २/२ सेट, तेल १ बाकस (१० लिटर), दाल, नुन, चिनी, चियापति, बिस्कुट लगायतका खाद्यान्न तत्काल उपलब्ध गराएका छन् ।
उक्त राहत वितरण कार्यक्रममा नेपाली कांग्रेस वडा नं. ४ का उपसभापति राजेश्वर बञ्जारा, मनिष बञ्जारा, समाजसेवी द्वारिका बञ्जारा, राजन बञ्जारा र रामहरि दाहाल लगायतको उपस्थितिमा राहत पिडितलाई हस्तान्तरण गरिएको अभियान्ता थापाले बताएका छन् ।