भरपाई आन्दोलन, भद्र अबज्ञा आन्दोलन र बिर्ता उन्मुलन आन्दोलनका हस्ती स्मरणको पानामा

काभ्रे । नेपाली कांग्रेस वागमती प्रदेशका महामन्त्री एवं पूर्व राज्यमन्त्री कञ्चनचन्द्र बादे श्रेष्ठलाई पितृशोक परेको छ ।
भरपाई आन्दोलन, भद्र अबज्ञा आन्दोलन र बिर्ता उन्मुलन आन्दोलनका हस्ती अग्रज योद्धा, जसले राणा शासन विरुद्धको आन्दोलनमा महत्वपूर्ण योगदान पु¥याएका प्रजातान्त्रिक योद्धा, सामाजिक अभियान्ता, नेपाली जनका अभिभावकले यस धर्तीबाट गत मंगलबार रातीबाट स्मरणको पानामा सीमित हुनुभएको छ । उहाँको विश्रामले राजनीतिक रुपमा राष्ट्रले प्रजातान्त्रिक आन्दोलनमा अपूरणीय क्षति व्यहोर्न पुगेको छ । स्वर्गवासी गोपालदास बादेको ९७ वर्षको उमेरमा निधन भएको परिवारले जानकारी गराएको छ । स्वर्गीय बादेको नेवारी परम्परा, संस्कृतिअनुसार बुधबार अन्तिम श्रद्धाञ्जली व्यक्त गर्दै दाहसंस्कार गरिएको हो ।
परिवारका अनुसार स्वर्गीय बादेका तीन छोरी र दुई जना छोरा मध्ये एक छोरी र श्रीमतीको यसअघि नै निधन भइसकेको छ भने कांग्रेस नेता कञ्चनचन्द्र बादे उहाँका कान्छा छोरा हुन् ।
स्व. गोपालदास बादेको जन्म वि.सं. १९८२ जेठमा बनेपा दछुटोलमा भएको थियो । नेपाली कांग्रेसमा आबद्ध उनले २००३ सालमा बीपी कोइरालाबाट सदस्यता लिएका थिए । उनी गणेशमान सिंह, सुन्दरराज चालिसे र राजदास बादेको प्रत्यक्ष निर्देशनमा निरंकुश राणा शासनको बिरूद्ध सशस्त्र आन्दोलनमा हतियारको ओसार पसारमा सक्रिय भएका थिए ।
परिवारका २ जना दाजु राजदास बादे र भाई धनदास बादेलाई राणाद्वारा फाँसीको सजाय सुनाई सर्बस्व हरण सुनाएको थियो । भरपाई आन्दोलन, भद्र अबज्ञा आन्दोलन र बिर्ता उन्मुलन आन्दोलनको नेतृत्व गरी बनेपालाई राणाहरूको बिर्ताबाट मुक्ति दिलाएका थिए । साथै प्रजातान्त्रिक आन्दोलनहरूमा सक्रिय रहि २०१७ सालको राजाको कु पछि केही समय प्रवास जीवन बिताइ निरंकुश पञ्चायत ब्यवस्थाविरूद्ध भएका आन्दोलनहरूमा सक्रिय सहभागिता जनाएका थिए ।
सत्याग्रह २०४२ र विभिन्न जन आन्दोलनहरूमा सक्रिय भई पटकपटक जेल र हिरासत जीवन बिताएका बादेले २०४६ सालको जन आन्दोलन तयारी र परिचालन समितिमा सक्रिय भूमिका निर्वाह गरि प्रजातन्त्र प्राप्तीपछि २०४८ सालको आम निर्वाचनमा नेपाली कांग्रेसबाट काभ्रे क्षेत्र नं ३ बाट सांसद पदको उम्मेदवार भएका थिए ।
यस अघि उनी वि.सं. २०१५ सालमा महाधिवेशन सदस्य, २०४८ र २०५२ महाधिवेशनमा महासमिति सदस्य र २÷३ महिना राणाशासनविरूद्ध लाग्दा प्रवासजीवनमा माहात्मा गान्धीको सामिप्यताबाट प्रभावित भई व्यवहार सुधार गुठी र चर्खा प्रचारक अभियान शुरु गरेका थिए ।