तपाईंको एक युनिट रगतले पाँच जनाको जीवन बच्छ ः व.प्रा.अ. यादव

नवनिर्वाचित कार्यसमितिको शपथ ग्रहण र पदस्थापनसँगै आजैबाट नेरेसो काभ्रे शाखा रक्तसञ्चार केन्द्रले यो सेवा आरम्भ गरेको छ ।

बिपशना शाक्य
काभ्रे । नेपाल रेडक्रस सोसाइटी काभ्रे शाखाको रक्तसञ्चार केन्द्रबाट पाँच प्रकृतिका रगतहरु उपलब्ध हुने जानकारी आज आयोजित शपथ ग्रहण तथा पदस्थापन कार्यक्रममा नवनिर्वाचित कार्यसमितिलाई बधाई तथा शुभकामना दिने क्रममा नेपाल रेडक्रस सोसाइटी केन्द्रीय रक्तसञ्चार केन्द्रका वरिष्ठ प्राविधिक अधिकृत सञ्जीव कुमार यादवले दिनुभएको छ ।
यादवका अनुसार हाम्रो शरीरबाट खेर जाने रगतलाई सदुपयोग गर्न सक्यौं भने कसैका जीवन दान दिन सक्छौं । नियमित रक्तदान गर्ने रक्तदाताको एक युनिट रगतले पाँच जना बिरामीले पुनर्जीवन प्राप्त गर्नेछन् । आजबाट नेरेसो काभ्रे शाखा रक्तसञ्चार केन्द्रबाट ५ प्रकृतिका रगतहरु वितरण हुने जानकारी यादवले गराउनुभएको छ । उहाँका अनुसार Whole Blood, Packed Red Blood Cells (PRBC), Platelet Rich Plasma (PRP), Platelet Concentrate (PC) र Fresh Frozen Plasma (FFP) यस किसिमका रगतहरु सहज रुपमा उपलब्ध हुने जानकारी गराउनुभएको छ ।
एक वर्ष अगाडिदेखि यो प्रक्रियामा रहेको रेडक्रस सोसाइटी काभ्रे शाखा रक्तसञ्चार केन्द्रले आजबाट पूर्ण रुपमा जिम्मेवारी बहन गर्न सफल भएको प्राविधिक राधा थापाले बताउनुभएको छ । उपत्यका सँगसँगै काभ्रे जिल्ला आसपासका बिरामीहरुले समेत लाभान्वित हुने आम नागरिकको विश्वास रहेको छ ।