निर्वाचनप्रति निराशा किन ?

गत मंसिर ४ गते सम्पन्न निर्वाचनमा मतदाताहरुको उपस्थिति निराशाजनक रह्यो । यसो हुनुमा जिम्मेवार को ? सबैको चासोको विषय बनेको छ ।
राजनीतिक वृत्तमा रहेका विभिन्न विश्लेषकहरुको अनुसार यस किसिमको संकेत नेपालको राजनीतिका लागि शुभ नरहने राय दिएका छन् । विगतको निर्वाचनहरुमा भन्दा यस पटकको निर्वाचनमा अत्यन्तै कम चासो र निर्वाचनमा सहभागिता पनि अत्यन्तै कम रहेको निर्वाचन आयोगले जारी गरेको विज्ञप्तिमा उल्लेख गरेको छ । यसबाट लोकतन्त्र, निर्वाचन आयोग, राजनीतिक दलहरु र तिनका नेताहरु गम्भीर छलफल र बहसमा सरिक हुनुपर्ने देखिएको छ । दिनप्रतिदिन जनतामा कम उत्साह देखिनुमा राजनीतिक दलहरु नै जिम्मेवार त छैनन् ? चासोको विषय बनेको छ । राजनीतिक दलहरुले जनतामा आएको यो वितृष्णा अन्त्यका लागि खेल्नुपर्ने भूमिका, जिम्मेवारी र दायित्वको बारेमा सजक हुनुपर्ने देखिन्छ ।
नेपाली जनताको बलिदानबाट प्राप्त गणतन्त्र लगायतका राजनीतिक मुद्दाहरुप्रति नै जनताहरुमा वितृष्णा आएको त होइन ? खोजीको विषय हुन आवश्यक छ । यदि यस विषयमा गम्भीर रुपमा चासो राखिएन भने प्राप्त सीमित अधिकार र उपलब्धीहरु नगुम्लान् भन्ने सकिन्न । यि र यस्तै विषयमा तत्काल राजनीतिक बहस हुन जरुरी छ । अन्यथा नेपालको राजनीतिक आकाशमा कालो बादल मडारिन सक्छ भन्ने संकेत नेपाली जनताहरुले दिइसकेका छन् । गएको स्थानीय चुनावमा जुन किसिमको सहभागिता रहेको थियो, ६ महिना नबित्दै मतदातामा उत्पन्न भएको नैराश्यताका बारेमा गम्भीर भएर चासो दिन आवश्यक छ । अन्यथा जुन संकेत देखा परेको छ, यसले संघीय राज्यलाई नै नकारात्मक रुपमा असफल बनाउने त होइन भन्ने शंकाहरु उब्जिएका छन् ।
त्यसैले नेपाली राजनीतिका प्रणयदाताहरुले यस बारेमा छलफल र बहस चलाउन आवश्यक छ । जन चाहाना विपरित व्यक्तिगत स्वार्थका लागि लोकतन्त्रको मूल्य, मान्यताभन्दा बाहिर राजनीतिक दलहरुको गतिविधिले नै आजको अवस्था निम्तिएको त होइन ? भन्ने विषयमा आम सरोकारको चिन्ता बढेको छ ।
त्यसैले नेपाली जनताको बलिदानबाट प्राप्त सीमित अधिकारहरुको संरक्षणका लागि नेपाली राजनीतिज्ञहरुले चासो दिनुपर्छ भन्ने ठम्याईमा हामी पुगेका छौं । ५÷५ वर्षमा आउने सबैभन्दा ठूलो दान मतदानलाई नेपाली राजनीतिज्ञहरुले दुरुपयोग गरेकै कारण आज यो अवस्थामा मतदाता पुगेका हुन् । यो परिणामले को, कसलाई, कति घाटा पु¥याउँछ भन्दा पनि मुलुकलाई राजनीतिक अस्थिरतातर्फ धकेल्न सक्छ । त्यसैले पनि यि संकेतहरुलाई उपेक्षा नगरियोस् र समयमै सम्बोधन होस् भन्ने हाम्रो आग्रह छ ।