आलु उत्पादक किसानहरुमा उत्साह थप्दै अन्तर्राष्ट्रिय बजारीकरण

“काभ्रेको चिनारी कोसेली आलुको तरकारी” नारा सहित आलुको प्याकेजिङ सुरु

काभ्रे । “काभ्रेको चिनारी कोसेली आलुको तरकारी” नारा सहित आलुको प्याकेजिङ सुरु भएको छ । पछिल्लो समय स्थानीय उत्पादनप्रति लक्षित गरेर विभिन्न किसिमका कृषि बालीहरुको दिगोपनका लागि स्थानीय सरकार र सरोकारवाला निकायहरु सक्रिय भएका छन् । जसको पछिल्लो उदाहरणका रुपमा पनौतीका आलु उत्पादक किसानहरु अग्रसर भएका छन् ।
आलु उत्पादक किसानहरुको साहारा बन्ने अपेक्षा अन्तर्राष्ट्रिय बजारीकरणको ब्रान्डिङ्गले जगाएको छ । विभिन्न कृृषिबालीहरुको दिगो बजारीकरणका लागि ब्रान्डिङ सहित उत्पादनका लागि किसानहरुलाई प्रोत्साहन दिने क्रम बढिरहेको प्रधानमन्त्री कृषि आधुनिकीकरण सुुपरजोन परियोजनाले जनाएको छ । विशेषगरी यो अन्तर्राष्ट्रिय बजारीकरणको ब्रान्डिङ्ग नगदेबालीहरुलाई लक्षित गरी त्यसमा पनि आर्गनिक प्रमाणित सहितको ब्रान्डिङ उत्पादन र विदेश निर्यातका लागि अझ राम्रो अर्थोपार्जन हुन सक्ने सोसँग सम्बन्धित विज्ञहरुको राय छ ।
काभ्रे जिल्लाका विशेषगरी पनौती, बनेपा, नाला, रविओपी, पाँचखाल, नमोबुद्ध तथा बेथानचोकको केही क्षेत्र आलु उत्पादनको हिसाबले अब्बल मानिँदै आएको छ । उपयुक्त हावापानी तथा बलौटे मलिलो माटोका कारण आलुु खेतिबाट कृषकहरुले राम्रै उत्पादन गर्न सफल भएका छन् । वर्षेनी करोडौंको उत्पादन भए पनि बजार मूल्य अस्थिर रहँदा कृषकहरुले डराइ डराइ खेति गर्दै आएका छन् । यसका बाबजुद पनि कम मूल्य हुँदा पेशाबाट विस्थापित नै हुनुपर्ने पिडित किसानहरुको गुनासो रहँदै आएको थियो ।
भनिन्छ, उत्पादनका सबै पक्षमा पारदर्शीता पाउनु उपभोक्ताको अधिकार हो । उत्पादक, उत्पादन मिति, गुणस्तर सहित खुलेको सामग्री खरिद गर्ने सबैको चाहना हुन्छ । उत्पादकको दिगो बजारको अपेक्षा तथा उपभोक्ताका लागि गुणस्तर युक्त सामान उपलब्ध गराउने उद्देश्यका साथ पनौती नगरका कृषकहरुले आलु प्याकेजिङ सुरु गरेका छन् । कृषकको हितसँगै जिल्लाको चिनारी समेत होस् भन्ने हेतुसहित आलुुको ब्राण्डिङ सहितको उत्पादन शुरु गरिएको कृषकहरुले बताएका छन् ।
प्रधानमन्त्री कृषि आधुनिकीकरण सुुपरजोन परियोजनाको आर्थिक सहयोगमा यस वर्ष कृषकहरुले बजारीकरणलाई प्राथमिकतामा राखी काम गरेका हुन् । उनीहरुले भण्डारण स्थल सहित आलुको प्याकजिङ शुरु गरेका छन् । किसानहरुका अनुसार हाललाई २, ३ र ५ किलोको आलुको प्याकेजिङ सुरु गरेको छ ।
सुपरजोन परियोजनाका अनुसार भण्डारण तथा प्याकेजिङ कार्यका लागि मात्र यो वर्ष १४ लाख भन्दा बढि बजेट उपलब्ध गराएको बताएको छ । उपयुक्त साइजका आलुुको गे्रडिङ गरी प्याकेजिङ गरिनेछ भने प्याकेजिङ गरिएको आलुको प्रतिकेजी मूल्य ८० रुपैंया तोकिएको छ । गुणस्तर तथा मूल्यमा एकरुपता हुने भएका कारण उपभोक्ताका लागि यो मूल्य खासै बढि नहुने स्थानीय कृषकहरुको दाबी छ ।
प्रविधिसँगै बजारीकरणको कार्यमा परियोजनाले गरेको कार्य फलदायी भएको कृषकहरु बताउँछन् । जिल्लाका अन्य क्षेत्रका कृषकहरुको उत्पादन पनि यसै प्रकृयाबाट बजारीकरण गर्न सकिए बिउ उत्पादन समेत विदेश निर्यात गर्न सहज हुने कृषकहरुको भनाई रहेको छ ।
यता पनौती नगर कृषि शाखा पनि किसानहरुबाट सुरु गरिएको यो अभियानलाई साथ दिन तयार रहेको कृषि प्राविधिक सम्झना लिम्खा बताउनुहुन्छ । कृषि शाखाले बजेटको समेत व्यवस्था गरेको छ । आगामी वर्षदेखि सार्थक रुपमा किसानहरुले आफ्नो उत्पादनको मूल्य पाउने अपेक्षा नगर कृषि शाखाले राखेको खुलासा गर्नुहुन्छ प्राविधिक लिम्खा ।