लिन ईन्टरनेशनल स्कुलमा ३७० जना कन्या तथा कुमारको पूजा

काभ्रेपलाञ्चोक/ बनेपामा रहेको लिन इन्टरनेशनल बोर्डिङ स्कुलले आज विद्यालय प्राङ्गनमा ३७० जना कन्या तथा कुमारको पुजा गरेको छ ।

वनेपामा करिब एकसय बीस बर्ष अगाडि देखि प्रत्येक बर्ष श्री कृष्ण जन्माअष्टमीको दिनमा कन्या तथा कुमार पूजा गरिदै आएको छ । सोही अवसरमा विद्यालयमा अध्ययनरत कक्षा नर्सरीदेखि कक्षा तीनसम्मका करिब ३७० जना बालबालिकहरुलाई विद्यालय प्राङ्गणमा नै कार्यक्रम आयोजना गरी उक्त पूजा गरिएको हो । उक्त  कार्यक्रममा विद्यालयको सञ्चालक समिति, प्रिन्सिपल, शिक्षक शिक्षिका, अभिभावकहरु र कतिपय विद्यार्थीहरूको समेत सहभागिता रहेको थियो ।

सो क्रममा बालबालिकाहरुलाई विभिन्न शैक्षिक सामग्रीहरुको अलवा धार्मीक परम्परा अनुसारको खानेकुराहरू वितरण गरिएको थियो ।

विशेषगरि बनेपामा विगत १२० बर्ष अगाडि देखि मनाउँदै आइएको यस पर्वहरुका बारेमा बालबालिकाहरुलाई प्रत्यक्ष सहभागिता गराएर पर्व, संस्कृति र सामाजिक परम्पराहरुको ज्ञान दिलाउने र अनुभूत गराउने उद्धेश्यले उक्त कन्या तथा  कुमारहरू पुजिएको विद्यालयका प्रबन्ध निर्देशक कृष्ण कुमार भण्डारी(शिशिर)ले बताउनु भयो ।