सार्वजनिक यातायातमा लैङ्गिक हिंसा रोक्न प्रविधिमा आधारित सुरक्षा प्रणाली प्रभावकारी बनाइन्छ : मन्त्री सीता बादी

काठमाडौँ / महिला, बालबालिका, लैङ्गिक तथा यौनिक अल्पसङ्ख्यक तथा सामाजिक सुरक्षा मन्त्री सीता बादीले सार्वजनिक यातायातमा हुने लैङ्गिक हिंसा न्यूनीकरणका लागि प्रविधिमा आधारित सुरक्षा तथा अनुगमन प्रणालीलाई थप प्रभावकारी बनाइने बताएकी छन्।

राष्ट्रियसभाको आजको बैठकमा सांसदहरूले उठाएका प्रश्नको जवाफ दिँदै मन्त्री बादीले सार्वजनिक यातायातमा महिलाले भोग्दै आएका यौनजन्य दुर्व्यवहार, असुरक्षा, भीडभाड तथा आवागमनसम्बन्धी समस्यालाई सम्बोधन गर्न सरकारले महिला लक्षित ‘ब्लु बस’ सेवा सञ्चालनमा ल्याएको जानकारी दिइन्।

उनले ‘ब्लु बस’ सेवाले लैङ्गिक असमानतालाई प्रोत्साहन नगर्ने स्पष्ट पार्दै विशेष जोखिममा रहेका नागरिकलाई आवश्यक संरक्षण, सुविधा र अवसर उपलब्ध गराउनु नै वास्तविक समानताको महत्वपूर्ण पक्ष भएको बताइन्। “समानताको अर्थ सबै नागरिकलाई सधैँ एउटै व्यवहार गर्नु मात्र होइन,” उनले भनिन्।

मन्त्री बादीका अनुसार ‘ब्लु बस’ सेवाको उद्देश्य महिलालाई सार्वजनिक जीवनबाट अलग गर्नु नभई उनीहरूको सुरक्षित आवागमन सुनिश्चित गर्नु हो। यस सेवाले महिलालाई अन्य सार्वजनिक यातायात प्रयोग गर्न रोक नलगाउने र नियमित सार्वजनिक यातायात प्रणालीलाई प्रतिस्थापन पनि नगर्ने उनले स्पष्ट पारिन्।

उनले तत्कालीन सुरक्षा उपायसँगै सबैका लागि सुरक्षित र सम्मानजनक सार्वजनिक यातायात प्रणाली निर्माण गर्ने दीर्घकालीन सुधारलाई पनि सँगसँगै अघि बढाइने बताइन्। यसका लागि सम्बन्धित मन्त्रालय, प्रदेश सरकार, स्थानीय तह, नेपाल प्रहरी, ट्राफिक प्रहरी, यातायात व्यवसायी तथा अन्य सरोकारवालासँग समन्वय गरी आवश्यक कार्यक्रम सञ्चालन गरिने उनले जानकारी दिइन्।

मन्त्री बादीले सार्वजनिक यातायातमा हुने लैङ्गिक हिंसाविरुद्धका कानुनको प्रभावकारी कार्यान्वयन, सार्वजनिक सवारीसाधनमा सिसिटिभी जडान, राइड–सेयरिङ एपमा एसओएस बटनको व्यवस्था तथा प्रविधिमा आधारित सुरक्षा र अनुगमन प्रणालीलाई थप सुदृढ बनाइने पनि बताइन्।