जिल्लालाई खुल्ला दिशामुक्त बनाउने अभियानमा सबै लाग

सन् २०१५ सम्ममा काभ्रेलाई खुल्ला दिशामुक्त जिल्ला बनाउने अभियान चलिरहेको छ । विभिन्न सरकारी तथा गैरसरकारी संस्थाहरु यो अभियानमा छन् । सोही अभियान अन्तर्गत हालसम्म १२ गाविसलाई खुल्ला दिशामुक्त घोषणा भइसकेका छन् ।

२०६६ मंसिरमा ठूलोपर्सेललाई जिल्लाकै पहिलो मुक्त क्षेत्र घोषणा गरिएको थियो । यो संगै मादन कुँडारी, सल्लेभुम्लु, कोलाँती, ढुङ्खर्क र सारदाबतासे गाविस पनि खुल्ला दिशामुक्त गाविस घोषणा भैसकेका छन् । हालै तिमाल क्षेत्रका मेच्छे, चापाखोरी, नारायणस्थान, सस्र्युृँखर्क, सरमथली, र बोल्देफेदिचे पनि खुल्ला दिशामुक्त गािवस गरिएको छ ।

सन् २०१२ को अन्त्ययसम्ममा आइपुग्दा १२ गाविस मात्रै घोषणा भएका छन् । सन् २०१५ सम्मको लक्ष्य पुरा गर्नु चुनौतीको विषय पनि हो । संख्यात्मक रुपमा हेर्ने हो भने त यो लक्ष्य पुरा हुन कठिन नै छ तर गुणात्मक रुपमा विकास गर्न सकियो भने मात्रै यो सम्भव छ । जिल्लाको प्रतिष्ठाको विषय समेत रहेको खुल्ला दिशामुक्त अभियानको लागि सबैले आफ्नो क्षेत्रबाट सहयोग गर्न आवश्यक छ । प्रत्येक जनता, गाउँ, नगर, क्षेत्र, जिल्ला स्थित सरकारी कार्यलय, राजनैतिक दल, नागरिक समाज यो अभियानमा लाग्नुपर्छ ।

चर्पी बनाउनकै लागि सरकारी तथा गैरसरकारी निकायको मुख ताक्ने प्रवृतिको अन्त्यय समेत हुनुपर्छ । गाविस कार्यलय, जिविसले पनि खुल्ला दिशामुक्त अभियानमा लागेका वडा र गाविसलाई केही रकम सहयोग गर्ने, पुरष्कृत र प्रोत्साहान गर्ने परिपाटीको विकास हुनुपर्छ । अनि मात्र सन् २०१५ सम्ममा जिल्लालाई खुल्ला दिशामुक्त जिल्ला घोषणा गर्ने अभियान सफल हुन सक्छ ।