कार्यकारीको लापर्वाहिले गर्दा, सामाजिक सुरक्षा भत्ता वितरणमा समस्या

पाँचखाल- पाँचखाल नगरपालिकामा चौथो कार्यकारीे प्रमुखको रुपमा आउनुभएको बिष्णु कुमारी भट्टराईको कमजोरीको कारण सामाजिक सुरक्षा भत्ता बितरणमा समस्या आएको छ ।

०७३ फाल्गुणमा आउनु भएको कार्यकारी भट्टराईले स्थानिय तहको निर्वाचन गराउने बिषयमा भन्दा नगरको अन्य कुनै कार्यमा ध्यान नदिदा विकास निर्माणको कार्य देखि सामाजिक सुरक्षा भत्ता वितरणको कार्यमा समेत समस्या परेको हो ।  सामाजिक सुरक्षा भत्ताको लागि पञ्जिकरण केन्द्रिय कार्यालयमा माग गर्नुपर्ने रकमको माग नगर्नुको साथै अध्याबधिक समेत नगराउंदा हाल सुरक्षा भत्ता बितरणमा बिवाद उत्पन्न भएको छ । पछिल्लो समयमा बैक मार्फत रकम उपलब्ध गराउने भएकोले अध्याबधिक गरी रकम माग गर्ने कार्य गर्नुपर्नेमा सवै काम अधुरै रहदा हाल समस्या आएको जानकारी प्राप्त भएको छ ।

फाल्गुणमा आउनु भएको कार्यकारी प्रमुख भट्टराई निर्वाचन सकिए लगतै अशारको दोस्रो हप्तामा सरुवा भै जाँदा अशार मसान्तमा सम्पन्न गर्नुपर्ने बिकास निर्माणको कार्य समेत लथालिंगे अवस्थामा रहेको थियो । अशार मसान्तले च्यापि रहेको समयमा कार्यकारी प्रमुख नहुदा भै रहेको विकास निर्माणको कार्यमा समस्या आएको थियो । अशारको २५ गते कार्यकारी प्रमुखको रुपमा पुन बासुदेव भेट्वाल आउनु भएपछि बिकास निर्माणको कार्यलाई निरन्तरता दिएको थियो ।

कार्यकारी प्रमुख भट्टराईले सामाजिक सुरक्षा भत्ता पाउनेहरुको अध्याबधि नगर्नु साथै बैंक खाताको लागि सरोकारवाला र वैंकमा समेत समन्वय नगर्दा थोरै रकम निकासा हुंदा हाल अपुरो रुपमा भत्ता बितरण भएको छ । पछिल्लो समयमा अध्याबधि गरे अनुसार ९ सय ६५ जनाले भत्ता पाउनु पर्नेमा कम रकम निकासा भएकै कारण १ हजारका दरले कम बितरण भएको जानकारी प्राप्त भएको छ ।

भत्ता बितरणमा अनियमितताको बिषयमा पाँचखाल नगरका कार्यकारी प्रमुख बासुदेव भेट्वालले भन्नुभयो “बिगतमा रकम माग गर्ने कार्यमा केही कमी कमजोरी भएकोले रकम थोरै आएकोले, आएको रकमलाई दामासाहिले वितरण गर्दा अपुग भएको हो” । ८ हजार पाउनु पर्नेले ७ हजार मात्रै पाएका छन् । सवैजनालाई १ हजार कम दिएर कसैलाई पनि हात खालि पठाउने कार्य नगरेको बताउनु भयो । पुरै रकम दिंदा कसैले रकमनै नपाउने हुदा १ हजार कम दिएको र तत्काल अपुग रकम दिने तयारी गरेको बताउनु भयो । कुन स्रोतबाट अपुग रकम दिने भनी सोधिएको प्रस्नको जवाफमा प्रमुख भेट्वालले भन्नुभयो अपुग रकमको निकासाको लागि केन्द्रिय पञ्जिकरणमा माग गरेका छौं । यदि त्यहाँ बाट आउन ढिला भएमा आन्तरिक स्रोतबाट भएपनि रकम बितरण गर्ने बताउनु भयो ।