शिक्षा र स्वास्थ्य मौलिक अधिकार हुन्ः मा. शिक्षा तथा स्वास्थ्य समिति सभापति जयपुरी घर्ती; “रोजगारमूलक शिक्षाको आधारभूमि भालेश्वरमा पाएँ

पनौती-भालेश्वर माध्यमिक विद्यालयको अभिभावक दिवसलाई सम्बोधन गर्ने क्रममा प्रतिनिधि सभा शिक्षा तथा स्वास्थ्य समितिका सभापति जयपुरी घर्तीले नेपाली नागरिकको शिक्षा र स्वास्थ्य मौलिक अधिकार भएको पुष्टि गर्नुभएको छ ।

त्यसलाई कार्यान्वयन गर्ने चरणमा अहिले रहेको बताउनुहुँदै शिक्षा र स्वास्थ्य नेपाली जनताको दैनिक जीवनसँग जोडिएको विषय हो । तसर्थ यस तर्फ राज्यको ध्यान गम्भिर रुपमा खिचिरहेको छ भने प्रतिनिधि सभा शिक्षा तथा स्वास्थ्य समिति दत्तचित्त भई लागेको छ । जसको परिणाम यो भालेश्वर मा.वि. भएको जानकारी दिँदै प्रमुख अतिथि सभापति घर्तीको थप कथन थियो– रोजगारमूलक वैज्ञानिक शिक्षा आजको आवश्यकता हो । त्यसका लागि समिति चिन्तित छ ।

मुलुकको ८० प्रतिशत हिस्सा ओगेटेको शैक्षिक निकायमा देखिएको अस्तव्यस्तलाई व्यवस्थित गराएर गुणस्तरीय उत्पादकमूलक शिक्षाका लागि गम्भिर रुपमा खटिरहेको स्मरण गराउँदै राज्यको यो चिन्तामा भालेश्वर माध्यमिक विद्यालयको यो योगदानलाई ठूलो गुणको रुपमा हेरिएको छ । रोजगारमूलक शिक्षाको आधारहरुमा कम्तीमा एउटा पालिकामा एउटा प्राविधिक शिक्षालयको नीति रहेको बताउनुभयो । यो राज्यको मात्र चासो नभएर समग्र मुलुकवासीको चाहना पनि हो । आफ्नो जीवनको पहिलो अनुभूति यसरी विद्यालयमा आएर सम्बोधन गरेको खुलासा गर्दै जीवनको अधिकांश समय मूलुकका कुनाकन्दरामै बितेको गुनासो राख्नुहुँदै सभापति घर्तीको कथन थियो नमूना विद्यालयलाई मुलुककै नमूना बनाउन आफ्नो तर्फबाट कुनै कसुर बाँकी नराख्ने बताउनु भएको छ ।

सम्बोधनकै क्रममा यो मुलुकबाट गरिबी कसरी हटाउने र सम्वृद्धमुलुक कसरी बनाउने भन्ने सवालमा राज्य गम्भीर रुपमा लागेको छ यसको मूल आधार भनेको शिक्षा स्वास्थ्य हो । विश्वका सम्वृद्ध मुलुकलाई हेर्ने हो भने पनि उनीहरुले शिक्षा, स्वास्थ्य, पर्यटन लगायतका विषय चासो दिएको पाइन्छ जसको कारण आज सम्वृद्ध मुलुकको रुपमा स्थापित भएका छन् । त्यसैले यो सपना पूरा गर्न अभिभावकको महत्वपूर्ण भूमिका रहने तथ्य सार्वजनिक भएको छ । त्यसैले बालबालिकाहरुको पहिलो पाठशाला घर हो तब मात्रै विद्यालयको दायित्वभित्र पर्छ । हामीहरुमा विकृतिले चरम सिमा नाघेको छ हामीले हाम्रो भन्न जानेनौं खालि मेरो मेरो भन्नाले सबथोक बर्बाद भएको छ । त्यसैले यावत् विषयमा गम्भीर बनौं भन्दै प्रमुख अतिथि घर्तीले राज्यलाई कमजोर बनाउने काम कहीँ कतैबाट नगरौं भन्नुभयो ।

कार्यक्रममा पूर्व सांसद रामहरि सुवेदी, सामाजिक अभियान्ता विश्वेश्वर बञ्जारा, वडा नं. ८ का वडाअध्यक्ष केशव बञ्जारा, विद्यालय व्यवस्थापन समितिका अध्यक्ष राजेन्द्र केसी, लेखा समिति सुपरिवेक्षण सदस्य अभिभावक प्रदीप खड्का, प्रअ रामचन्द्र थापा, दिनेश थापा, विद्यार्थी रविन थापा, शिक्षक अभिभावक संघका अध्यक्ष रामकृष्ण बञ्जारा, विद्यालयसँग सरोकार राख्ने व्यक्तिहरु लगायतले विद्यालयको सकारात्मक पक्षका बारेमा चर्चा गरेका थिए । कार्यक्रमको सञ्चालन सहायक प्रअ हरिप्रसाद तिमल्सिनाले गर्नुभएको थियो ।