पनौतीको बजार क्षेत्रमा सिसि क्यामरा, जनघनत्वको चापलाई मध्यनजर राख्दै बर्थिङ सेन्टर

पनौती/भ्रमण बर्ष २०२० र पनौतीमा लाग्ने १२ बर्षे मकरमेला साथै बजार क्षेत्रको पुर्ण सुरक्षाको लागि पनौती नगरले सिसि क्यामराको व्यवस्था गर्ने तयारी गरेको छ ।

नगरपालिकामा रहेको सम्पुर्ण बजार क्षेत्रलाई सुरक्षीत गर्ने प्रमुख उद्देश्यका साथ उक्त सिसि क्यामरा जडानको तयारी गरेको नगरका प्रमुख प्रशासकिय अधिकृत ईन्द्रप्रसाद अधिकारीले जानकारी गराउनु भयो । अधिकारीका अनुसार नगरपालिकाको प्रमुख उद्देश्य नगरवासिको हितको लागि कार्य गर्ने भएकोले क्यामराको व्यवस्था गर्न लागेको हो ।

नगरमा रहेका बिभिन्न संघ संस्था संग समन्वय गरि विगतमा बसपार्क क्षेत्रमा मात्रै सिसि क्यामरा जडान गरेको थियो । अव सवै वडामा रहेको बजार क्षेत्रमा विस्तार हुनेभएको छ । जसले गर्दा वजार क्षेत्रको सुरक्षा साथै भ्रमण बर्ष र मकर मेलालाई समेत सुरक्षा हुने भएको छ । नगरले सवैतिर क्यामरा जडान गरेपछि नगरवासि सुरक्षीत हुनुका साथै बिगतको जस्तो चोरीको समस्याबाट मुक्त हुन्छन बजार क्षेत्र ।

त्यसैगरी नगरको मुख्य बजार क्षेत्र भित्र वडा नं ७ मा रहेको बर्थिङ सेन्टर सोमबारबाट सञ्चालनमा ल्याएको छ । स्वास्थ्य चौकी भित्र रहेको सो बर्थिङ सेन्टर र प्रयोगशालाको नगर प्रमुख भीम न्यौपानेले उद्घाटन गर्नुभएको थियो । बर्थिङ सेन्टर र प्रयोगशालाको उद्घाटन गर्दै नगरप्रमुख न्यौपानेले भन्नुभयो “बर्थिङ सेन्टरलाई भविश्यमा सामुदायीक अस्पतालको रुपमा विकस गर्दै अगाडी बढाइने छ ” ।