कोरोनासँग जुध्न सक्षम छ महाभारत- अध्यक्ष जिम्बा

महाभारत/काभ्रे जिल्लाको अति विकट बस्तीका रुपमा परिचित महाभारत गाउँपालिकाले कोभिड १९ का विरुद्ध आफ्नो गाउँपालिकालाई चुस्त दुरुस्त राख्न सफल भएको गाउँपालिकाका अध्यक्ष कान्छालाल जिम्बाले बताउनुभएको छ ।

कोभिड १९ का विरुद्ध प्रचारप्रसारमा माइकिङ, पोष्टरिङ, ब्यानर, पर्चाहरु वितरण र हेल्थ डेस्कको सेवा समेत प्रदान गरेको छ । प्रत्येक गाउँ प्रवेश गर्ने नागरिकहरुको लागि स्वास्थ्य परीक्षणको व्यवस्था साथै ३५ बेडको क्वारेन्टाइन र २४ सै घण्टा स्वास्थ्य संस्थाबाट परीक्षणको सुविधा उपलब्ध गराएर गाउँबासीलाई सुसूचित गराउन सफल भएको देखिन्छ । गाउँपालिकाका अध्यक्ष जिम्बाका अनुसार गाउँपालिकाभित्र रहेका अति आवश्यक पसलहरुलाई व्यवस्थित गर्ने क्रममा बिहान ८ देखि १० बजे र साँझ ३ देखि ७ बजेसम्म खुल्ला रहने नीति अख्तियार गर्दै कोही कसैले यो विषम् परिस्थितिको फाइदा लिने क्रममा कालोबजारी गरिएको पाइएमा कडाभन्दा कडा कारवाही गर्नका लागि गाउँपालिका उपाध्यक्ष चेतकुमारी माझीको नेतृत्वमा अनुगमन समिति बनेको र उक्त समितिले गाउँपालिकाभरिकै अनुगमन गरिरहेको अध्यक्ष जिम्बाले बताउनुभएको छ ।

उहाँका अनुसार गाउँपालिकाभित्र रहेका विपन्न परिवारमध्ये मजदुरी गरेर जीविकोपार्जन गर्ने परिवारलाई राहतको व्यवस्थापन गरिनुको साथै करिब ४ सयको हाराहारीमा अलपत्र मजदुरहरुको उद्धार गरी आफ्नो गन्तव्यसम्म पु¥याउने काम गाउँपालिकाले गरेको समेत अध्यक्ष जिम्बाले बताउनुभएको छ । यसरी उद्धार गरिएकोमा टिप्पणीप्रति अध्यक्ष जिम्बाको तर्क थियो– दिउँसो मजदुरको उद्धार गर्दा लकडाउन उल्लंघन गरेजस्तो हुने भएकाले कसैलाई पनि असर नपर्ने गरी रातारात उद्धार गरिएको बताउनुहुँदै यस किसिमको टिप्पणीले कुनै अर्थ नराख्ने जिम्बाको भनाई छ ।

जिल्लाकै मात्र नभएर सिंगो मुलुककै कान्छो नेतृत्वको रुपमा निर्वाचित कान्छालाल जिम्बाले संघीयतालाई सहज रुपमा गाउँपालिकामा उतार्न सफल भएको यस अघिका क्रियाकलापले पनि पुष्टि गरेको देखिन्छ भने कोरोना भाइरसका कारण बिलखबन्धनमा परेका सयौं अलपत्र नागरिकहरुलाई कुनै पनि किसिमको पिडा महसुस हुन नदिई जन्मथलोमा सहज रुपमा उपस्थिति गराएर नेतृत्वको एउटा नमूना प्रस्तुत गरेको स्थानीय पदमलाल तिमल्सिनाले बताउनुभएको छ ।