बालबालिकाप्रति हाम्रो दायित्व

आर.एल.श्रेष्ठ
मुलुक कोभिड–१९ र प्राकृतिक विपत्ले आक्रान्त भइरहेको अवस्थामा बालबालिकाप्रति अभिभावकले कस्तो किसिमको व्यवहार गर्न सकियो भने बालबालिकामा नैराश्यता उत्पन्न हुँदैन भन्ने सवालमा चर्चा गर्ने जर्मको गरेको छु ।

अध्ययन अनुसार बालबालिकाहरुमा पनि कोरोना भाइरसबाट संक्रमित भएको प्रमाणित भएको छ । यस्तो अवस्थामा अभिभावक झनै सचेत भई कोरानाको संक्रमणबाट बच्ने सुरक्षाका उपायहरु अवलम्बन गर्न आवश्यक छ ।

यो वर्ष मौसममा फेरबदल भएको छ । यसले बालबालिकाहरुलाई मानसिक रुपमा प्रभाव पार्न सक्छ । त्यसैले त्यसतर्फ सचेत बनेर अभिभावकहरुले मौसम फेरबदलका सवालमा सुसूचित गराउन आवश्यक छ । यदि अभिभावकले मौसम परिवर्तनबाट मनोवैज्ञानिक असरका बारेमा बुझाउन सकिएन भने बाल मनोविज्ञान अनुसार बच्चाहरुमा नकारात्मक असर पर्न सक्ने र त्यसले बालबालिकाको प्रतिरोधात्मक शक्तिमै प्रभाव पार्ने पनि अध्ययनमा उल्लेख छ ।

लामो समय बालबालिकाहरु घर–कोठामै बस्न बाध्य छन् । गत वर्षहरुझैं उनीहरु बाहिर घुमफिर गर्न पाएका छैनन्, जसका कारण बाहिरी वातावरणका बारेमा उनीहरुलाई उत्सुकताहरु जाग्नु स्वभाविक हो । त्यस कारण मौसम अनुकुल बनेको अवस्थामा अभिभावकले उनीहरुलाई त्यस्तै किसिमको व्यवहार प्रस्तुत गरेर यथार्थ उनीहरुका बिचमा राखिदिन आवश्यक छ । हिजो–आजका दिनमा मौसमी रोग थोरै लाग्नु स्वभाविक हो । घरमै रहेका बालबालिकाले घरमै खरिद गरिराखेका विभिन्न खानेकुरा खाने र अभिभावक पनि लामो समय घरमै बस्नुपरेको दिग्दारीका कारण बच्चालाई उचित स्याहार नपुग्न पनि सक्छ ।

त्यसैगरी गर्मी मौसम भएको कारण बालबालिकालाई झाडापखाला, ठेउला, दादुरा तथा विभिन्न एलर्जीका समस्याहरु देखापर्नु स्वभाविक हो । यसबाट सुरक्षित राख्नका लागि अभिभावकको महत्वपूर्ण भूमिका हुन्छ । समय सँगसँगै मौसममा आएको परिवर्तनले औंलो, मस्तिष्क ज्वरो तथा तराई क्षेत्रमा मलेरिया लगायतका समस्याहरु निम्तिन सक्छन् । यसका लागि अभिभावक चखानो हुन आवश्यक छ ।

बालबालिकाको खानपानमा विशेष सावधानी अपनाउनु पर्छ । गर्मी मौसममा लामखुट्टे, झिँगा तथा अन्य किराफट्याँग्रा बढी सक्रिय हुने हँदा त्यसबाट बच्न झुलको प्रयोग तथा घरवरिपरि एवं भान्सा कोठाको सरसफाइमा ध्यान दिन आवश्यक छ ।