प्रहरीमा व्यवहार सच्याउन महासंघको ध्यानाकर्षण

काठमाडौं/नेपाल पत्रकार महासंघ केन्द्रीय समितिले एक विज्ञप्ति मार्फत् प्रहरीहरुको व्यवहार सच्याउन आग्रह गरेको छ । नेपाल फोटो पत्रकार क्लवका सदस्य चन्द्रबहादुर आले र अनलाइन खवरडटकमका पत्रकार रोयल आचार्यलाई समाचार संकलनका क्रममा प्रहरीले दुव्र्यवहार गर्दै पक्राउ गर्ने प्रयास गरेको घटनाप्रति नेपाल पत्रकार महासंघको गम्भीर ध्यानाकर्षण भएको विज्ञप्तिमा उल्लेख छ ।
संविधान दिवसको सन्दर्भमा शुक्रबार दिउँसो एक अधिवक्तासँग नयाँ बानेश्वरमा रिपोर्टिङ गर्ने क्रममा प्रहरी निरीक्षकको नेतृत्वमा रहेको टोलीले पत्रकारद्वयलाई दुव्र्यहार गर्दै पक्राउको प्रयास गरेको भनिएको छ ।
स्वतन्त्र रूपमा पेशागत धर्म निर्वाह गरिरहेका पत्रकारमाथि प्रहरीद्वारा गरिएको यो हर्कत प्रेस स्वतन्त्रतामाथिको हस्तक्षेप हो । महासंघ प्रेसमाथि भएको ज्यादतीको कडा शब्दमा भत्र्सना गर्दछ र प्रेसको संवैधानिक अधिकारको सम्मान गर्न तथा निर्वाध रूपमा काम गर्ने वातावरण निर्माण गर्न महासंघ सम्बन्धित निकायको ध्यानाकर्षण गराउँदछ विज्ञप्तिमा भनिएको छ ।
त्यसैगरी सञ्चारको क्षेत्रमा क्रियाशील भई अनवरत रुपमा उर्जा थप्दै आउनुभएका कैलालीस्थित रेडियो कैलाली एफएममा कार्यरत पत्रकार निर्मला पहराई मृत अवस्थामा फेला परेको दुखद् खवरले नेपाल पत्रकार महासंघ स्तब्ध भएको छ भनी महासचिव रमेश विष्टद्वारा हस्ताक्षरित विज्ञप्तिमा उल्लेख गरिएको छ । २३ वर्षीया पहराईलाई कैलालीको घोडाघोडी नगरपालिका–५ स्थित जंगलमा झुण्डिएको अवस्था फेला पारिएको विज्ञप्तिमा उल्लेख छ ।
नेपाल पत्रकार महासंघ स्वर्गीय पहराईप्रति भावपूर्ण श्रद्घाञ्जली अर्पण गदै दिवंगत आत्माको चिरशान्तिको कामना र शोकसन्तप्त परिवारजनमा गहिरो समवेदना व्यक्त गर्दछ ।
विज्ञप्तिमा भनिएको छ, केही दिनअघि सम्पर्कविहीन रहेकी पहराई झुण्डिएको अवस्थामा फेला परेकोले यस घटनाबारे गहिरोसँग अनुसन्धान गरी सत्यतथ्य सार्वजनिक गर्न सम्बन्धित निकायसँग नेपाल पत्रकार महासंघ माग गर्दछ भनिएको छ ।