लाज पचेपछि कसको के लाग्छ ?

नेपाली जनप्रति कोभिड–९ ले थिल्थिल्याएको आँतमा नुनचुक लगाउने काम दुई तिहाइको दम्भ बोकेको सरकारले गरेको छ । यो लाचारी सरकारले आफ्नो दुई तिहाइको घमण्डमा गत मंगलबार यातायात व्यवसायीसँग घुँडा टेक्ने काम गरेको छ । एकाएक यातायात व्यवसायीको पक्षमा वकालत गर्नुले अनुत्तरित प्रश्नहरु खनिएका छन् ।

यातायातका साधनमा सकेजति यात्रु कोच्न पाउने निर्णय गरेको छ । भाडा पनि सकेजति घुमाउरो ढंगले लिन पाउने कस्तो राम्रो निर्णय यो सरकारले गरेको छ । योभन्दा उत्तम अरु के हुन सक्छ ?

यता गाडिभरि यात्रु राखेपछि सोझासिधा यात्रीहरु भाडा त पूरा लिने होइन होला नि भन्दै खुसखुस गर्दैथिए । गाडिको मुख्य मालिक कन्डक्टरले भाडासाडा घटेको छैन भन्दै रुखो व्यवहार देखाउँदै भाडा असुल्दै थियो । यति दिनु र उति दिनु भन्दै आफ्नो चरित्र व्यवहारिक रुपमा देखाउँदै थियो । त्यहि बसभित्र एक छेउमा यो पंक्तिकार पनि रमिते बनिरहेको थियो । पालो उही रमितेको आयो, “होइन भाइ के भनेको ? बढि भाडा नलिन भनेको छ सरकारले । किन यसो गर्नुभएको ?” भन्दा “होइन सर भाडा घटेको छैन ।” हिजो सरकारको निर्णय त यस्तो छ नि भनेर कुरा राख्दा नराख्दै स्टेरिङमा बसेका चालकको तुच्छ अभिव्यक्ति खनियो । यहाँसम्मको भाडा दिनु, ओर्लिनु भन्दै पड्किए । स्थिति अलि गर्मायो । यतिकैमा कन्डक्टरले आवाज बाक्लिएपछि १०३ मा कल गरेर सोध्नुस् भन्न पुगे । एक यात्रुले तत्कालै ह्याण्ड्स फ्रि गरेर कल गरे । उताबाट जवाफ आयो, भाडा साविकै हो, घटेको छैन ।

अब भन्नुस्, यो नौटंकी सरकारका बारेमा हामीले के अपेक्षा राख्न सक्छौं ? यस्ता गैर जिम्मेवारीपूर्ण व्यवहारका बारेमा आवाज बुलन्द गर्न खोज्नेहरुलाई हनुमानहरुले सिध्याउने हुन् कि भन्ने चिन्ता पो लागेर आएको छ । त्यस दिनको जुन घटना एउटा प्रतिनिधि पात्र मात्र हो । जुन दिनदेखि सार्वजनिक यातायात खुले, व्यवसायीहरुले राज्यले तोकेको एउटा मात्र निर्णयलाई पछ्याएका छन्, त्यो हो डबल भाडा र अटेसम्म यात्रु गाडिमा कोच्न । त्यो दृश्य देखेर पनि नदेखेझैं गर्छन् चोकमा रहेका सुरक्षाकर्मीहरु । यो अवस्थामा नागरिकले लाचारीको विकल्प पाउँदैनन् । मन्त्री परिषद्को निर्णयले भाडा घटाउ भनेकै छैन भन्दै छापामा अन्तर्वार्ता दिन पुग्छन्, जिम्मेवार व्यवसायी । यो अवस्थामा नेपाली नागरिकले के अपेक्षा राख्ने ? सरकार भन्छ भाडा घटेको छ, व्यवसायी भन्छन् भाडा घटेको छैन । यो मुलुकमा यस्ता किसिमका द्वयत्त चरित्र भएका नीति निर्माताहरुको बोलवाला छ भन्नुको विकल्प छैन । धन्य छ लाचारी सरकार ! कति लुट्छस् लुट्, ढिलो, चाँडो नेपाली जनताले हिसाबकिताब लिनेछन् ।